धनगर आरक्षणासाठी अनोखे आंदोलन : सर्वच राजकीय पक्षांची चिन्हे बांधली साखळदंडात!

इंदापूर (जि. पुणे) : धनगर (Dhangar) आरक्षणाचा (reservation) मुद्दा पुन्हा एकदा पेटला असून आंदोलनाची सुरुवात इंदापूरमधून (Indapur) झाली आहे. राजकारणाचे जोडे बाजूला ठेवत धनगर ऐक्य परिषदेने अनोखे आंदोलन करत सर्वच राजकीय पक्षांची चिन्हे साखळदंडाने बांधत आरक्षणासाठी रणशिंग फुंकले आहे. (Agitation in Indapur for Dhangar community reservation)

धनगर ऐक्य परिषदेचे संस्थापक अध्यक्ष डाॅ. शशिकांत तरंगे यांच्या मार्गदर्शनाखाली इंदापूर येथे धनगर समाजाची बैठक पार पडली. त्यानंतर सभागृहासमोरच सर्वच प्रमुख राजकीय पक्षांच्या चिन्हांना साखळदंडाने बांधत आरक्षण मिळण्यासाठी घोषणा देत सरकारविरोधात रोष व्यक्त करण्यात आला.

डॉ. शशिकांत तरंगे म्हणाले की, गेली ७० वर्षे सर्वच राजकीय पक्षांनी धनगर आरक्षणाचा (एसटीमध्ये समावेश) प्रश्न प्रलंबित ठेऊन समाजाला सुविधांपासून वंचित ठेवले आहे. धनगर समाजाची प्रलंबित असणारी ‘र’ आणि ‘ड’ शब्द दुरुस्ती करून धनगर समाजाचा आरक्षणाचा प्रश्न मार्गी लावावा. तामिळनाडू, कर्नाटक, आंध्र प्रदेश, उत्तर प्रदेश, हिमाचल प्रदेश, छत्तीसगड या राज्यातील बारा जातींच्या हिंदी व इंग्रजी भाषेच्या उच्चारांचा, शब्दांच्या दुरूस्तीचा महत्वपूर्ण निर्णय केंद्रीय मंत्रीमंडळाने घेतला आहे.

केंद्र सरकारच्या धर्तीवर महाराष्ट्रातील धनगर समाजाच्या या शब्द दुरुस्तीचा निर्णय मंत्रिमंडळाने तातडीने घ्यावा व समाजाचा अनुसूचित जमातीत समावेश करावा. अन्यथा धनगर समाजाच्या वतीने संपूर्ण महाराष्ट्रात या पद्धतीने राजकीय पक्षांना साखळ दंडात बांधण्याचे आंदोलन धनगर ऐक्य परिषदेच्या वतीने करण्यात येईल, असा इशाराही तरंगे यांनी या वेळी दिला.

यावेळी महेंद्र रेडके, कुंडलिक कचरे, तुकाराम करे, विशाल मारकड, अमोल करे, विजय चोरमले, अमोल कोळेकर यांचेसह मोठ्या संख्येने धनगर तरुण आंदोलनात सहभागी झाले होते.