पुण्यात भाजपला दे धक्का ; नगरसेविका शितल सावंत यांच्या पतीचा राष्ट्रवादीत प्रवेश

पुणे : येत्या काही दिवसात पुणे महानगरपालिकेची निवडणूक आहे. या पार्श्वभूमीवर पक्षबदल करण्यास सुरवात झाली आहे. पुणे राष्ट्रवादी शहराध्यक्ष प्रशांत जगताप यांनी काही दिवसांपूर्वी दावा केला होता की भाजपचे काही नगरसेवक राष्ट्रवादीच्या वाटेवर आहेत. त्यांच्या या विधानावर आज शिक्कामोर्तब झाले.

पुणे महापालिकेतील भाजपच्या विद्यमान नगरसेविका शीतल सावंत यांचे पती अजय सावंत (Ajay Sawant) यांनी राष्ट्रवादी कॉग्रेसमध्ये प्रवेश केला आहे. राज्याचे उपमुख्यमंत्री, पुण्याचे पालकमंत्री अजित पवार ( Ajit Pawar) यांच्या उपस्थितीत अजय सावंत यांनी राष्ट्रवादीत प्रवेश केला आहे.

पुणे महापालिका निवडणुकीच्या पार्श्वभूमीवर सावंत यांचा राष्ट्रवादी प्रवेश महत्वाचा मानला जात आहे. भाजपचे वीस ते पंचवीस नगरसेवक राष्ट्रवादीत प्रवेश करणार असल्याचे राष्ट्रवादीच्या सुत्रांनी सांगितले. अजित पवार यांची आज कोरोना आढावा बैठक पुण्यात होती. या बैठकीनंतर सावंत यांनी राष्ट्रवादीत प्रवेश केला.

आढावा बैठकीत अजित पवार यांनी शाळांबाबत महत्वाचा निर्णय घेतला. पुण्यातील प्राथमिक आणि माध्यमिकचे वर्ग पुर्णवेळ सुरु करण्यात येणार असल्याचे अजित पवार यांनी सांगितले. राज्य सरकारने 1 फेब्रुवारीपासून शाळा-महाविद्यालये सुरू करण्याचा निर्णय घेतला होता. पुण्यातील कोरोना संसर्गाची स्थिती पाहता पहिली ते आठवीचे वर्ग हे चार तासच भरवले जात होते. पण आता पहिली ते आठवीचे वर्गही पूर्णवेळ भरवण्यात येणार असल्याचा निर्णय राज्य सरकारने घेतला आहे.

जिल्ह्यात लसीकरणालाही वेग आला असून, अनेकांचा पहिला डोस झाला आहे. तर पुणे जिल्ह्यातील दुसऱ्या डोसचे प्रमाणही 86 टक्के इतके झाले आहे. पण पुणे आणि पिंपरी-चिंचवड शहरात 15 ते 18 वयोगटातील लसीकरणाचे प्रमाणही कमी झालं आहे. ग्रामीण भागात चांगले लसीकरण झाले आहे. 15 ते 18 वयोगटातील मुलांसाठी लसीचा तुटवडा आहे. पण येत्या सोमवारी लसींचा साठा उपलब्ध होईल. मी सुद्धा मुंबईत गेल्यावर संबंधितांशी बोलतो. राज्यात कुठेही लसींचा तुटवडा पडू नये यासाठी लवकरात लवकर निर्णय घेऊ, असेही यावेळी अजित पवार यांनी सांगितले.