Asim Sarode: भाजपा आमदाराकडून माझ्या जीविताला धोका; असीम सरोदेंचा गंभीर आरोप

Pune News:बीड जिल्ह्याच्या सीमेवर असलेल्या मांदगाव येथे राष्ट्रवादी काँग्रेस शरदचंद्र पवार पक्षाचे पदाधिकारी राम खाडे यांच्यावर शनिवारी रात्री जीवघेणा हल्ला झाला. या हल्ल्यामागे भाजप आमदार सुरेश धस असल्याचा आरोप आता करण्यात येत आहे. राम खाडे यांनी सुरेश धस यांच्याशी निगडित असलेलं भ्रष्टाचाराचा प्रकरण बाहेर काढले होते आणि त्याच अनुषंगाने हा हल्ला झाला असल्याचा आरोप करण्यात येत आहे.

राम खाडे यांनी जो भ्रष्टाचाराचा आरोप सुरेश धस यांच्यावर केला आहे. त्या प्रकरणांमध्ये वकील म्हणून असीम सरोदे हे काम पाहत आहेत. त्यांनी या प्रकरणाबाबत सरकारनामाला माहिती देताना काही गंभीर खुलासे केले आहेत. ज्याप्रमाणे राम खाडे यांच्या जीविताला धोका आहे. त्याच पद्धतीने माझ्या देखील जीवितला देखील सुरेश धस यांच्याकडून धोका असल्याचं असीम सरोदे यांनी सांगितले आहे.

दरम्यान राम खाडे अहिल्यानगरहून बीडकडे आपल्या सहकाऱ्यांसह कारने प्रवास करताना ते मांदगाव येथील एका हॉटेलमध्ये जेवणासाठी थांबले होते. हॉटेलबाहेर पडताच तोंडाला रुमाल बांधलेल्या १०-१२ संशयितांनी त्यांच्या गाडीवर अचानक हल्ला केला. हल्लेखोरांकडे सत्तूर, काठ्या आणि बंदुकीसारखी धारदार शस्त्रे होती. त्यांनी गाडीच्या काचा फोडल्या आणि राम खाडे यांच्यासह सर्व सहकाऱ्यांवर निर्घृण मारहाण केली. हल्ल्यात राम खाडे हे मुख्य टार्गेट होते.

रक्तबंबाळ अवस्थेत खाडे बेशुद्ध पडले. त्यांना प्रथम अहिल्यानगर येथील खासगी रुग्णालयात दाखल करण्यात आले. मात्र प्रकृती खालावल्याने नंतर पुण्यातील संचेती रुग्णालयात हलवण्यात आले आहे; सध्या त्यांची प्रकृती गंभीर आहे.

हल्ल्यानंतर खाडे यांच्या सहकाऱ्यांनी थेट भाजपचे आमदार सुरेश धस यांच्यावर गंभीर आरोप केले आहेत. खाडे यांचे निकटवर्तीय व भाजपचे माजी कार्यकर्ते मनोज चौधरी यांनी सांगितले की, “सुरेश धस यांचा भ्रष्टाचार उघडकीस आणल्याच्या रागातून त्यांनी हा हल्ला घडवला आहे.” त्यांनी CID किंवा SIT ने चौकशी करून सुरेश धस यांची कसून तपासणी करावी, अशी मागणी केली आहे. यानंतर या प्रकरणांमध्ये वकील असीम सरोदे यांनी काही गंभीर खुलासे केले आहेत.

सरकारनामाशी बोलताना असीम सरोदे म्हणाले, 'देवस्थानच्या जमिनी बाबतची काही माहिती गेल्या काही वर्षांपासून खाडे हे गोळा करीत होते . या गोळा केलेल्या माहितीच्या आधारे समोर आले की ज्या पद्धतीने वक्फ च्या जागांची विक्री मुस्लिम समाजातील काही लोकांकडून केली जात आहे. त्याच पद्धतीने हिंदू मंदिरांच्या जागांची देखील विक्रीतून भ्रष्टाचार केला जात असल्याचं समोर आलं होतं. यामध्ये थेट भाजप आमदार यांचा सहभाग असल्याचा देखील दिसून आलं होतं.

मात्र भाजपा आमदार असल्याने त्यांच्यावर पोलीस कोणतीही कारवाई करत नव्हते, त्यामुळे ईडी कार्यालयामध्ये एक हजार कोटींचा घोटाळा झाल्याबाबतची तक्रार सुरेश धस यांच्या विरोधात आम्ही दाखल केली होती. या प्रकरणांमध्ये कोर्टामध्ये याचिका देखील दाखल करण्यात आली होती. त्या अनुषंगाने याच प्रकरणातील सर्वांना अटक कोणाची सूचना देखील पोलिसांना देण्यात आली होती. त्यानुसार काहींना अटक झाली आहे. मात्र सुरेश धस यांना अटक झालेली नाही.

दरम्यान या प्रकरणांमध्ये राम खाडे यांनी माझ्या जीवितला देखील धोका संभवू शकतो असा सावधगिरीचा इशारा दिला होता. बीड आणि मराठवाड्यातील काही भागातील राजकारण हे अत्यंत हिंसक पद्धतीचे आहे. हे आपण गेल्या काही दिवसांपासून पाहिले आहे. आपल्या विरुद्ध कोण काही बोलत असेल तर त्याला संपूर्ण टाकला पाहिजे, असं काही नेते करीत आहेत. त्यामुळे माझ्या जीवाला देखील सुरेश धस यांच्याकडून धोका असण्याची शक्यता नाकारता येत नाही, असे असीम सरोदे म्हणाले.