Eknath Shinde In Baramati : बारामतीत आज शिंदे-फडणवीस-पवार; धनगर आंदोलकांची भेट घेणार ?

Baramati Political News : बारामती येथे धनगर समाजाने एसटी आरक्षणाच्या अंमलबजावणीसाठी ९ नोव्हेंबरपासून आंदोलन सुरू केले आहे. धनगर कार्यकर्ते चंद्रकांत वाघमोडे यांचे बेमुदत उपोषण सुरू आहे. या आंदोलनाला तालुक्यातून मोठा प्रतिसाद मिळत आहे. यातच एका कार्यक्रमानिमित्त शनिवारी मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार हे बारामतीत येत आहेत. बारामतीत आल्यानंतर आंदोलकांच्या मागणीनुसार ते धनगर उपोषकर्त्यांची भेट घेणार का, याकडे लक्ष आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

धनगर समाजासाठी एसटी आरक्षणाची अंमलबजावणी करावी, या मागणीसाठी चौंडी येथे दोन महिन्यांपूर्वी आंदोलन करण्यात आले होते. यावर ५० दिवसांचा कालावधी देऊनही सरकारने कोणताही ठोस निर्णय घेतला नाही. सरकारच्या या वेळकाढूपणाचा निषेध करत धनगर समाजाच्या आंदोलनाची बारामती ठिणगी पडली आहे. या आंदोलनाची धग तीव्र करण्यासाठी दोन दिवसांपूर्वी बारामतीत बंद पुकारण्यात आला होता. त्याला शहरात उत्स्फूर्त प्रतिसाद मिळाल्यानंतर आंदोलनाचे लोन तालुकाभर पसरले. आता गावागावांतून या आंदोलनाला पाठिंबा मिळू लागला आहे.

दरम्यान, नऊ वर्षांपूर्वी बारामतीतच भाजपचे तत्कालीन प्रदेशाध्यक्ष तथा उपमुख्यमंत्री देवेंद्र फडणवीस यांनी सत्ता आल्यास पहिल्या कॅबिनेटमध्ये धनगरांना आरक्षण देऊ, असा शब्द दिला होता. मात्र, राज्यात आणि केंद्रात भाजपचे सरकार स्थापन होऊनही नऊ वर्षांत आरक्षणाबाबत कुठलीही भूमिका सरकारच्या वतीने घेण्यात आली नाही. सत्तेत येताच फडणवीसांना आपल्या शब्दाचा त्यांना विसर पडल्याचा आरोप होत आहेत. यूपीए आणि महायुती सरकारने धनगर समाजाची फसवणूक केली आहे. आता समाजाच्या भावना तीव्र झाल्या असून, आरक्षण मिळेपर्यंत मागे हटणार नाही, अशी भूमिका आंदोलकांनी मांडली आहे.

सरकारच्या वेळ काढूनपणाचा निषेध करण्यासाठी आणि लवकरात लवकर आरक्षणाच्या अंमलबजावणीसाठी बारामती धनगर समाज एकवटला जात आहे. ठोस निर्णयाचा जीआर काढला जात नाही आणि उपोषण सोडवण्यास मुख्यमंत्री येत नाहीत, तोपर्यंत आम्ही आंदोलन मागे घेणार नाही, अशी भूमिका उपोषणकर्ते चंद्रकांत वाघमोडे यांनी घेतली आहे.

या पार्श्वभूमीवर आज मुख्यमंत्री एकनाथ शिंदे, उपमुख्यमंत्री फडणवीस आणि पवार बारामतीत आहेत. ते आंदोलन स्थळाला भेट देण्याची दाट शक्यता आहे. त्यामुळे बारामती, दौंड, इंदापूर तालुक्यांतील धनगर समाजातील लोकांनी मोठ्या संख्येने आंदोलनस्थळी जमावे, असे आवाहन वाघमोडे यांनी केले आहे.

आता मनोज जरांगे पाटलांचे उपोषण सोडवण्यासाठी जालन्यात गेलेले मुख्यमंत्री शिंदे, धनगरांना आरक्षणाचा शब्द देणारे उपमुख्यमंत्री फडणवीस आणि खुद्द बारामतीचे आमदार उपमुख्यमंत्री पवार बारामतीत आल्यानंतर धनगर आंदोलकांची भेट घेणार का? याचीच चर्चा रंगली आहे.

(Edited by Sunil Dhumal)