Pune News: राज्य सरकारने शैक्षणिक संस्थांच्या १०० मीटर परिसरात गुटखा, पानमसाला, सिगारेट, ई-सिगारेट आणि इतर तंबाखूजन्य पदार्थांच्या विक्रीवर बंदी घातली असतानाही पुण्यात अनेक भागांत नियमांचे सर्रास उल्लंघन सुरू असल्याचे दिसून आले आहे.
‘सकाळ’च्या पाहणीत शहरातील विविध शैक्षणिक संस्थांबाहेर टपऱ्या, पान दुकाने आणि किरकोळ विक्रेत्यांकडून विद्यार्थ्यांना सहजपणे तंबाखूजन्य पदार्थ उपलब्ध करून दिले जात असल्याचे स्पष्ट झाले.पुणे शहरातील शाळा आणि महाविद्यालयांच्या परिसरात तंबाखूजन्य पदार्थांची खुलेआम विक्री होत असल्याचे गंभीर वास्तव समोर आले आहे.
विशेष म्हणजे शाळांच्या प्रवेशद्वाराजवळच गुटखा आणि सिगारेट विक्री होत असल्याने विद्यार्थ्यांमध्ये व्यसनाधीनतेचा धोका वाढत असल्याची भीती व्यक्त केली जात आहे. शासनाच्या आदेशानुसार शैक्षणिक संस्थांच्या १०० मीटर परिसरात अशा विक्रीस बंदी असली तरी प्रत्यक्षात नियमांची अंमलबजावणी अत्यंत ढिसाळ असल्याचे चित्र आहे.
‘सकाळ’च्या पाहणीत शिवाजीनगर, पाषाण, पर्वती, खडकी, सिंहगड रस्ता, नऱ्हे-धायरी, वारजे, बाणेर, औंध, कोंढवा, वाकड, हडपसर आणि कात्रज परिसरातील अनेक शाळा-महाविद्यालयांजवळ तंबाखूजन्य पदार्थांची विक्री सुरू असल्याचे दिसून आले.
शिवाजीनगरमधील अनेक शैक्षणिक संस्थांजवळ टपऱ्यांवर गुटखा, पानमसाला आणि सिगारेटची विक्री सुरू असल्याचे दिसले. काही ठिकाणी विद्यार्थ्यांची गर्दीही पाहायला मिळाली.
पाषाण परिसरातील शाळा आणि कोचिंग क्लासेसजवळील दुकानांमध्ये गुटखा आणि सिगारेट सहज उपलब्ध असल्याचे निदर्शनास आले. स्थानिक नागरिकांनी याबाबत वारंवार तक्रारी करूनही कारवाई होत नसल्याचा आरोप केला.
पर्वती भागात शाळांच्या अगदी जवळ तंबाखूजन्य पदार्थांची विक्री सुरू असल्याचे आढळले. विशेष म्हणजे काही दुकानांमध्ये अल्पवयीन विद्यार्थ्यांनाही हे पदार्थ विकले जात असल्याची चर्चा स्थानिकांनी केली.
खडकीतील महाविद्यालयांच्या परिसरात विद्यार्थ्यांना लक्ष्य करून विक्री होत असल्याचे चित्र होते. सिगारेट आणि पानमसाल्याची खुलेआम विक्री सुरू असल्याने पालकांनी चिंता व्यक्त केली आहे.
सिंहगड रस्त्यावरील अनेक महाविद्यालयांजवळ टपऱ्यांमधून तंबाखूजन्य पदार्थ विकले जात आहेत. वाहतूक आणि विद्यार्थ्यांची मोठी वर्दळ असतानाही प्रशासनाकडून दुर्लक्ष होत असल्याचे दिसते.
या भागातील काही शाळांच्या बाहेर गुटखा आणि सिगारेट विक्री सुरू असल्याचे समोर आले. स्थानिक नागरिकांनी प्रशासनाने संयुक्त कारवाई करावी, अशी मागणी केली आहे.
वारजे भागातील शैक्षणिक संस्थांबाहेर तंबाखूजन्य पदार्थ विक्रीवर कोणतेही नियंत्रण नसल्याचे दिसले. काही ठिकाणी बंदीची सूचना फलकही नसल्याचे आढळले.
आयटी हब म्हणून ओळखल्या जाणाऱ्या या भागांतही शाळा आणि महाविद्यालयांबाहेर तंबाखूजन्य पदार्थ विक्री सुरू असल्याचे चित्र होते. अनेक ठिकाणी विद्यार्थी गुटखा आणि सिगारेट खरेदी करत असल्याचे दिसून आले.
या भागांत शाळांजवळील किरकोळ दुकानांतून तंबाखूजन्य पदार्थ सहज उपलब्ध होत असल्याचे स्पष्ट झाले. पालकांनी प्रशासनाकडे कठोर कारवाईची मागणी केली आहे.
* शाळा आणि महाविद्यालयांच्या १०० मीटर परिसरातील सर्व दुकानांची तपासणी
* तंबाखूजन्य पदार्थ विकणाऱ्यांवर तात्काळ दंडात्मक कारवाई
* शैक्षणिक संस्थांबाहेर ‘तंबाखूमुक्त परिसर’ फलक लावणे
* विद्यार्थ्यांसाठी जनजागृती मोहिमा राबवणे
* पोलीस, महापालिका आणि अन्न व औषध प्रशासनाची संयुक्त मोहीम
आरोग्य तज्ज्ञांच्या मते, पुण्यात शालेय आणि महाविद्यालयीन वयातील विद्यार्थ्यांमध्ये व्यसनाधीनतेचे प्रमाण वाढण्यामागे तंबाखूजन्य पदार्थांची सहज उपलब्धता हे एक प्रमुख कारण आहे. लहान वयात गुटखा, सिगारेट आणि पानमसाल्याच्या सेवनामुळे कर्करोग, हृदयविकार, फुफ्फुसांचे आजार तसेच मानसिक आरोग्याच्या समस्या निर्माण होऊ शकतात.
पालकांनी शाळांबाहेरील या विक्रीबाबत तीव्र नाराजी व्यक्त केली आहे. विद्यार्थ्यांच्या आरोग्याशी संबंधित गंभीर विषयाकडे प्रशासन दुर्लक्ष करत असल्याचा आरोप त्यांनी केला आहे. काही नागरिकांनी संयुक्त तपास मोहीम राबवून अशा दुकानांवर कठोर कारवाई करण्याची मागणी केली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.