Kasba News : पाठिंबा कुणाला मनसेचे ठरेना: धंगेकर म्हणतात, तिथे तर सारे माझे मित्रच!

Kasba-Chinchwad By-Election : कसबा पोटनिवडणुकीरुन राजकारण तापले आहे. उमेदवारांनी या निवडणुकीसाठी आपला जोरदार प्रचारही सुरु केला आहे. मात्र, कसबा पोटनिवडणुकीसंदर्भात मनसेची भूमिका अद्याप अस्पष्ट आहे. त्यामुळे मनसेचे कार्यकर्तेही संभ्रमात आहेत.

कसबा पोटनिवडणुकीबाबत मनसे शनिवारी अधिकृत भूमिका जाहीर करणार आहे. शहर कार्यकारणीची बैठक झाल्यानंतर मनसे पुढील आपली भूमिका स्पष्ट करणार आहे. मनसे भाजपला पाठिंबा देणार का? की तठस्थ राहणार याकडे सर्वांचे लक्ष लागले आहे.

दुसऱ्या बाजूला रवींद्र धंगेकर (Ravindra Dhangekar) यांनी मनसे (MNS) महाविकास आघाडीलाच (Mahavikas Aghadi) पाठिंबा देईल, असा विश्वास व्यक्त केला आहे. त्यामुळे आता मनसे नेमकी काय भूमिका घेतं हे पाहणं महत्वाचं असणार आहे.

रवींद्र धंगेकर या संदर्भात बोलताना म्हणाले, ''पुणे शहरात माझे अनेक मित्र आहेत आणि भाजपमध्ये पण माझे मित्र आहेत. त्यामुळे सर्वच जण मला मदत करतील'', असा विश्वास त्यांनी व्यक्त केला. तसेच त्यांना मनसे पाठिंबा देईल का? असा प्रश्न विचारण्यात आला, त्यावर धंगेकर म्हणाले, ''हा प्रश्न आहे का? सहकारी आहेत ते माझे, मदत तर करणारच'', असं उत्तर त्यांनी दिलं.

दरम्यान, रवींद्र धंगेकर हे दोनदा नगरसेवक होते. त्यांनी काही वर्ष मनसेत काम केलेलं आहे. त्यामुळे त्यांचा मनसेत देखील चांगला संपर्क आहे. मात्र, आता मनसे नेमकी काय भूमिका घेणार? याकडे सर्वांचे लक्ष लागले आहे.

तसेच चिंचवड आणि कसबा विधानसभा पोटनिवडणुकीच्या प्रचारात राष्ट्रवादी 20, तर भाजप 40 प्रचारकांची फौज उतरवणार आहे. भाजपकडून गडकरी, नारायण राणे (Narayan Rane), रावसाहेब दानवे, भागवत कराड हे केंद्रीय मंत्री प्रचारात उतरणार आहेत.

महाविकास आघाडीकडून राष्ट्रवादीचे अध्यक्ष शरद पवार, प्रदेशाध्यक्ष जयंत पाटील, विरोधी पक्षनेते अजित पवार यांच्यासह वीस जणांची फौज तयार आहे. त्यामुळे आता आरोप-प्रत्यारोपाचे राजकारण पाहायला मिळण्याची शक्यता आहे.