Pune News, 20 Apr : बारामती विधानसभा मतदारसंघात काँग्रेसचे निष्ठावंत आणि बारामतीच्या पवार घराण्याशी हाडवैर घेत सतत संघर्ष करणारे माजी मंत्री अनंतराव थोपटे यांचे पुत्र माजी आमदार संग्राम थोपटे यांच्यासाठी भाजपने प्रवेशाची दारे उघडी केली आहेत. भाजपची ही उपमुख्यमंत्री अजित पवार यांना शह देण्यासाठी खेळलेली मोठी खेळी असल्याचं बोललं जात आहे.
पुणे जिल्ह्यामध्ये शहरी भागावर काही प्रमाणात भाजपचा प्रभाव असला तरी जिल्ह्यातील ग्रामीण भागात मात्र राष्ट्रवादीचंच वर्चस्व आहे. यंदाच्या विधानसभा निवडणुकीमध्ये देखील हे चित्र पाहायला मिळालं. शहरी भागात भाजपचे आमदार तर ग्रामीण भागात अजित पवारांनी आपली ताकद दाखवून दिली. याचमुळेच अजित पवारांची कोंडी करण्याच्या दृष्टिकोनातून भाजपने संग्राम थोपटे यांच्यासाठी पक्षाची दारे खुली केल्याचं बोललं जात आहे.
पुणे जिल्ह्यात आतापर्यंत भाजपला पक्षाचा विस्तार मोठ्या प्रमाणात करता आलेला नाही. भाजपची पुणे जिल्ह्यात अजित पवार यांच्यामुळे झालेली कोंडी फोडण्यासाठी भाजप पुणे जिल्ह्यातील काही बड्या नेत्यांच्या शोधात होती. त्यामध्ये पहिल्यांदा संग्राम थोपटे हे भाजपच्या गळाला लागले आहेत. पुढील काळामध्ये पुरंदर विधानसभा मतदारसंघात देखील भाजपच्या गळाला मोठा नेता लागण्याची शक्यता आहे.
लोकसभा निवडणुकी दरम्यान संग्राम थोपटे यांनी ज्येष्ठ नेते शरद पवारांशी जुळवून घेतले होते. लोकसभेला थोपटेंनी अजित पवारांच्या (Ajit Pawar) पत्नी सुनेत्रा पवार यांच्याविरोधात प्रचार केला. लोकसभा निवडणुकीत सुप्रिया सुळेंनी जो मोठा विजय साकार केला त्यामध्ये थोपटे कुटुंबाचा सिंहाचा वाटा होता.
लोकसभा निवडणुकीत भोर-वेल्हा-मुळशी विधानसभा मतदारसंघात ज्या पद्धतीने मतदान झालं त्याच्या विपरीत परिस्थिती विधानसभा निवडणुकीत पाहायला मिळाली. सुप्रिया सुळे आणि शरद पवार यांचा फारसा फायदा थोपटेंना झाला नाही. त्या उलट अजित पवारांनी केलेल्या खेळीमुळे थोपटेंना चितपट व्हावं लागलं.
आगामी काळामध्ये बारामती लोकसभा मतदारसंघावर वर्चस्व स्थापित करायचं तर भोर वेल्हा, मुळशी विधानसभा मतदारसंघावर आपलं वर्चस्व प्रस्थापित करणं आवश्यक असल्याचं लक्षात घेऊन राज्यात महायुतीची सत्ता आल्यानंतर अजित पवारांच्या टार्गेटवर संग्राम थोपटे असल्याचं पाहायला मिळालं.
अजित पवार यांनी संग्राम थोपटे यांच्या राजगड सहकारी साखर कारखान्याला एनसीडीसीकडून मिळालेले कर्ज मिळू दिलं नाही, तसेच कारखान्याच्या कारभाराची चौकशी करण्याबाबतच्या हालचाली सुरू केल्या आहेत. एकीकडे सत्तेचा फायदा करून घेत अजित पवारांनी पुढील पाच वर्षांमध्ये भोर वेल्हा मुळशी मतदारसंघांवर आपलं पूर्ण वर्चस्व स्थापित करण्यासाठी केलेला प्लॅन आणि दुसरीकडे सत्तेत असल्याने मतदारसंघांमध्ये शिंदे शिवसेनेची ताकद वाढू लागली आहे.
तसेच काँग्रेसकडून मिळत नसलेल्या सहकार्य या सर्वांमुळे संग्राम थोपटे चांगलेच कात्रीत सापडले होते. यावर संग्राम थोपटे यांनी अचूक खेळी करत या कोंडीवर मात केली आहे. मात्र त्याबरोबरच भाजपने (BJP) देखील संधी साधली आहे. अजित पवार यांच्या खेळींना शह देण्यासाठी आता महाशक्ती भाजपच्या सतेचा फायदा थोपटे यांना करून घ्यायचा आहे.
त्यामुळे हा प्रवेशाचा घाट संग्राम थोपटे यांनी घातला असल्याचं बोललं जात आहे. तर दुसरीकडे अजित पवारांच्या विरोधातही जिल्ह्यात एक भक्कम नेतृत्व संग्राम थोपटे यांच्या रूपाने भाजपला मिळण्याची शक्यता आहे. पुणे जिल्ह्यातील ग्रामीण भागाचा विचार केला सध्या भाजपचा दौंडमध्ये एक आमदार आहे. आमदार अॅड. राहुल कुल हे शांत, संयमी, अभ्यासू नेते म्हणून ओळखले जातात.
त्यांच्यासोबत संग्राम थोपटे यांच्यासारखा आक्रमक आणि मतदारसंघावर मोठं वर्चस्व असणारा नेता मिळाला, तर भाजपला जिल्ह्यामध्ये आपले वर्चस्व प्रस्थापित करण्यात मोठी मदत होणार आहे. ही जोडी अजित पवार आणि शरद पवारांच्या राजकारणाला भाजपच्या राजकीय ताकदीने सहज शह देऊ शकते, अशा रीतीने भाजपने हा राजकीय डाव टाकल्याचं बोललं जात आहे.
२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.