Dilip Walse Patil: मराठा आरक्षण लढ्याचा फटका वळसे पाटलांना; मुख्यमंत्री शिंदेंच्या उपस्थितीत...

Manchar : मराठा आरक्षणाच्या लढ्यात राष्ट्रवादी काँग्रेसमधील नेते (अजित पवार गट) दिलीप वळसे पाटील यांच्या मतदारसंघातील मंचर बस स्थानकाचे उद्घाटन वादात सापडले आहे. ११ नोव्हेंबर रोजी मुख्यमंत्री एकनाथ शिंदे,उपमुख्यमंत्री अजित पवार, दिलीप वळसे पाटील, भाजपचे नेते चंद्रकांत पाटील, खासदार डॉ. अमोल कोल्हे, नीलम गोऱ्हे यांच्या उपस्थिती या बस स्थानकाचे उद्घाटन होणार आहे, पण सकल मराठा समाजाने या कार्यक्रमास तीव्र विरोध केला आहे.

"पहिलं आरक्षण मगच उद्घाटन" अशी थेट भूमिका घेत राज्याच्या प्रमुख नेत्यांना कार्यक्रमस्थळी काळे झेंडे दाखवून अपमान करण्याचा इशारा मंचरचे माजी सरपंच दत्ता गांजळे यांनी दिला आहे. सहकारमंत्री दिलीप वळसे पाटलांच्या मतदारसंघातील मंचर बस स्थानक सात वर्षांपासून उद्घाटनाच्या प्रतीक्षेत असताना उद्घाटनप्रसंगी वादात सापडले आहे.

मराठा आरक्षणाबाबत चर्चा करण्यासाठी सरकारचं शिष्टमंडळ मनोज जरांगे यांची भेट घेणार आहे. आतापर्यंत तीनदा मुहूर्त हुकल्यावर हे शिष्टमंडळ आज छत्रपती संभाजीनगर शहरात येणार आहेत. या भेटीत शिष्टमंडळाकडून जरांगे यांना टाइम बॉन्ड दिलं जाण्याची शक्यता आहे. त्यामुळे मनोज जरांगे आणि सरकारचं शिष्टमंडळ यांच्यातील आजची भेट महत्त्वाची समजली जात आहे.

हे शिष्टमंडळ थेट मुंबईहून छत्रपती संभाजीनगरच्या विमानतळावर दाखल होणार आहे. तेथून जरांगे उपचार घेत असलेल्या रुग्णालयात जाऊन त्यांची भेट घेतील. चार मंत्र्यांचे शिष्टमंडळ भेट घेणार आहे. या शिष्टमंडळात मंत्री उदय सामंत, शंभूराजे देसाई, धनंजय मुंडे, संदीपान भुमरे आणि अतुल सावे यांचा समावेश असण्याची शक्यता आहे.

कार्तिकी एकादशीची शासकीय महापूजा उपमुख्यमंत्र्यांच्या हस्ते होऊ देणार नाही, असा इशारा मराठा क्रांती मोर्चाचे राज्य समन्वयक रामभाऊ गायकवाड यांनी दिला आहे. मंदिर समितीचे सहअध्यक्ष गहिनीनाथ महाराज औसेकर यांच्या उपस्थितीमध्ये समिती सदस्यांची बैठक बोलावण्यात आली होती.

महायुतीत अजित पवारांनी उपमुख्यमंत्रिपदाची शपथ घेतल्यानंतर पंढरपूरला कार्तिकी एकादशीला पूजेचा मान उपमुख्यमंत्री देवेंद्र फडणवीसांना, की उपमुख्यमंत्री अजित पवारांना मिळणार यावरून नवा पेच निर्माण झाला आहे.