Supriya Sule : महाराष्ट्रात हाल सोसते मराठी! भाषा गौरव दिनीच सुप्रिया सुळेंनी सांगितली मराठीची व्यथा, म्हणाल्या "पुणे विमानतळावरच..."

Pune News, 27 Feb : राज्यभरात आज मराठी भाषा (Marathi) गौरव दिन साजरा केला जात आहे. मात्र, याच दिवशी आपल्याच राज्यात मराठी भाषेचा आवाज कसा दाबला जातोय हे शरद पवारांच्या राष्ट्रवादीच्या (NCP SP) खासदार सुप्रिया सुळे यांनी उघडकीस आणलं आहे.

सुळे (Supriya Sule) यांनी आपल्या एक्सवर एक पोस्ट शेअर केली आहे. ज्यामध्ये त्यांनी पुणे विमानतळावर मराठीतून उद्घोषणा होत नसल्याचा दावा केला आहे. त्यांनी ट्विटमध्ये लिहिलं की, पुण्यातील आंतरराष्ट्रीय विमानतळावर मराठी भाषेतून उद्घोषणा होत नसल्याचे आढळून आले आहे.

महाराष्ट्रात असूनही जर मराठी भाषेतून उद्घोषणा होत नसेल तर ही अतिशय खेदाची बाब आहे. तर पुणे (Pune) विमानतळावर मराठी भाषेतून उद्घोषणा व्हाव्या या मागणीचे निवेदन पुण्यातील शरद क्रीडा सांस्कृतिक प्रतिष्ठानचे अध्यक्ष लक्ष्मीकांत खाबिया यांच्या वतीने देण्यात आल्याची माहिती देखील त्यांनी यावेळी दिली.

२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप

"मराठी भाषेला नुकताच अभिजात भाषेचा दर्जा प्राप्त झाला आहे. याखेरीज मराठी अस्मिता जपण्यासाठी तसेच मराठी भाषेचा प्रचार व प्रसार होण्यासाठी राज्यातील प्रत्येक विमानतळावर हिंदी व इंग्रजी भाषेसह मराठीतूनही उद्घोषणा होणे आवश्यक आहे.

माझी नागरी हवाई उड्डाणमंत्री के राममोहनजी नायडू यांना नम्र विनंती आहे की, कृपया आपण या मागणीची नोंद घेऊन याबाबत संबंधित विभागाला आवश्यक त्या सूचना द्याव्या"; अशी मागणी देखील त्यांनी आपल्या ट्विटमधून केली आहे. त्यावर आता राज्य सरकार आणि केंद्र सरकार काय भूमिका घेणार हे पाहणं महत्वाचं ठरणार आहे.