Maval Crime : मावळातील तिसऱ्या खूनाचाही झाला उलगडा,पत्नीनेच केला गेम

Maval Crime News : रविवारी (ता. ४) भरदुपारी गहूंजे (ता.मावळ,जि.पुणे) येथे एका व्यक्तीचा खून झाला होता. त्या खूनाचा तपास लागला आहे. पत्तीनेच पतीचा काटा काढल्याचे तपासात उघडकीस आले आहे.

काल भरदुपारी (ता.४) सूरज राजेंद्र काळभोर (वय २९, रा.आकुर्डी,पिंपरी-चिंचवड) याचा निर्घूण खून करण्यात आला होता. त्याची पत्नी अंकिता (वय २८)हिने दगडाने ठेचून, गळा चिरून आणि फावड्याने डोक्यात घाव घालून केल्याचे पोलिसांनी शोधून काढले.

पतीचा खून केल्यानंतर चार लुटारूंनी आम्हा दोघांवर हल्ला करून लुटल्याचा बनाव अंकिताने केला होता. मात्र, त्यात तिला खरचटल्याएवढीही जखम न झाल्याचे पोलिसांनी हेरले. त्यामुळे तिच्यावरच संशळ बळावला. अन् अखेर तिचे बिंग फुटले. अंकिताला अटक केली आहे. आज (सोमवारी) वडगाव मावळ येथील न्यायालयात तिला हजर करणार असल्याचे तळेगाव दाभाडे पोलीस ठाण्याचे वरिष्ठ पोलिस निरीक्षक सत्यवान माने यांनी `सरकारनामा`ला सांगितले.

चारित्र्यावरून सूरज संशय घेत असल्याने त्याच्यात व अंकितात भांडणे होत होती. त्याची परिणती थेट खूनात झाली.दरम्यान, दोन महिन्यांत दोन राजकीय खूनांसह काल तिसरा खून झाल्याने मावळ तालुका पुन्हा एकदा हादरला होता. त्यातही पिंपरी-चिंचवडचे पोलीस आयुक्त म्हणून विनयकुमार चौबे यांनी पदभार स्वीकारल्यानंतर शहरातील व त्यातही मावळातील गुन्हेगारीने पुन्हा डोके वर काढले आहे. तेथे एकामागोमाग एक खून होत आहेत.

सूरज हा पिंपरी-चिंचवडमधील एका पॉलीटेक्निक कॉलेजात चतुर्थश्रेणी कर्मचारी म्हणून काम करीत होता. तर, त्याची पत्नी अंकिता ही सुद्धा पिंपरी-चिंचवड महापालिकेत याच पदावर आहे.यावर्षी २७ एप्रिलला या दोघांचे लग्न झाले होते.

आकुर्डीत राहणाऱ्या सुरजच्या आईने याबाबत फिर्याद दिली आहे. त्यानुसार काल सूरज हा पत्नीसह प्रतीशिर्डी शिरगाव (ता.मावळ) येथील साईंच्या दर्शनासाठी गेला होता. तेथून अंकिताने त्याला आपल्या माहेरी गहूंजेला वडिलांच्या शेतावर नेले. तेथे बेसावध सूरजवर तिने घरातून आणलेल्या सूरीने वार केले. शेतातील फावड्याने डोक्यात घाव घातले. नंतर दगडाने डोके ठेचले होते.

(Edited By : Mangesh Mahale)