Supriya Sule : ‘होय, मी बदला घेतला’... ; सुळेंनी फडणवीसांना सुनावलं

Supriya Sule : "होय मी बदलाच घेतला," अशा भावना राज्याचे उपमुख्यमंत्री देवेंद्र फडणवीस यांनी नुकत्याच व्यक्त केल्या आहेत. यावरुन विरोधकांनी त्यांच्यावर टीका केली आहे.(Supriya Sule latest news)

शिवसेना पक्षप्रमुख उद्धव ठाकरे यांच्यावर फडणवीस यांनी जोरदार टीका करीत 'होय मी बदलाच घेतला,' अशा भावना व्यक्त केल्या आहेत. एका वृत्तवाहिनीच्या कार्यक्रमात बोलताना त्यांनी विविध प्रश्नांना उत्तरे दिली. एखादी व्यक्ती थेट तुमच्या पाठीत खंजीर खुपसते तेव्हा राजकारणात जिवंत राहून त्याला ते परत करावं लागतं असंही ते म्हणाले.

फडणवीसाच्या या विधानावर राष्ट्रवादी कॉंग्रेसच्या नेत्या, खासदार सुप्रिया सुळे यांनी फडणवीस यांचे नाव न घेता त्यांच्यावर जोरदार हल्लाबोल केला आहे. त्या माध्यमाशी बोलत होत्या. "राज्याच्या राजकारणात प्रथमच बदल्याची भाषा मी ऐकली व प्रसारमाध्यमात पाहिली अशा प्रकारे गोष्टी करणे दुर्दैवी आहे," असे सुप्रिया सुळे म्हणाल्या.

सुप्रिया सुळे म्हणाल्या, "एखाद्या राजकीय कटुतेतून भारतीय जनता पक्षाचे एक मोठे नेते ‘होय, मी बदला घेतला’ म्हणणे धक्कादायक होते. ज्या संस्कृतीत मी वाढले, जे स्वर्गीय यशवंतराव चव्हाण यांचे संस्कार माझ्यावर झाले, त्यानुसार विरोध हा वैचारिक असला पाहिजे. त्यात बदल्याची भाषा कधी नसते,"

"माजी मंत्री जितेंद्र आव्हाड यांच्या संर्दभात जी कारवाई करण्यात आली त्यातून राज्यातील राजकारण किती खालच्या पातळीवर जाऊन गलिच्छ झाले आहे, हे दिसून आले. अशाप्रकारे हीन दर्जाचे राजकारण मला कधी अपेक्षित नव्हते. परंतु दुर्देवाने तसे आपल्याकडे घडते," अशी खंत सुळे यांनी व्यक्त केली.

काय म्हणाले होते फडणवीस..

"तुमच्यासोबत २४ तास राहणारी, सत्ता भोगणारी आणि निवडून आलेली व्यक्ती थेट तुमच्या पाठीत खंजीर खुपसते तेव्हा राजकारणात जिवंत राहून त्याला ते परत करावं लागतं. असं केल नाही तर तुम्हाला राजकारणात जगता येत नाही. राजकारणात चांगलंच रहायला हवं पण तुमच्या चांगुलपणाचा कुणी दुरुपयोग करत असेल, बेईमानी करत असेल तर त्याला जागा दाखवायला हवी आणि मी ती दाखवली. मला याचा अभिमान आहे. तुम्ही माझ्यासोबत बेईमानी केलीत तर त्याचा बदला मी घेईन आणि घेतला," असे फडणवीस म्हणाले होते.