Sharad Pawar : पांडुरंगाच्या दर्शनावर शरद पवार, म्हणाले,' 'गाजावाज,नाटक करतं... '

Sharad Pawar News : 'अस्तिक की नास्तिक माझ्याबद्दल बोलतं जातं. मी पांडुरंगाचे दर्शन घ्यायला जातो. पण मी कधी गाजावाजा करत नाही. नाटक करत नाही. दर्शन करायला जातो हे काय जगाला सांगायची गरज नाही, प्रसिद्धीपेक्षा दर्शन समाधानकारक असतं, असे ज्येष्ठ नेते शरद पवार म्हणाले.

वारीमध्ये जाऊन पांडुरंगाच्या दर्शनासाठी जाणारा खरा वारकरी आहे, पांडुरंगाच्या नावाने व्यावसाय करणाऱ्या घटकांना मी पांडुरंगाचा भक्त मानत नाही, असे देखील शरद पवार यांनी सांगितले. राष्ट्रवादी अध्यात्मिक वारकरी आघाडी आयोजित वारकरी संमेलनात शरद पवार बोलत होते.

'मला पोलिसांनी इथे येण्याच्या आधी विचारलं की तुम्ही जाणार आहात का? मी म्हणलो हो जाणार आहे. काही लोकांना मी जाणार म्हणून अस्वस्थता जाणवली पण हे जे लोकं आहेत पांडुरंगाचे खरे भक्त आहेत का?', असा सवाल शरद पवार यांनी केला.

'अनेक वेळा मी माहिती घेण्याचा प्रयत्न करतो, वारकरी संप्रदाय, अधात्मिक आघाडी नावाने काम करणारे अनेक घटक आहेत. त्यांचे किर्तन, विचार ऐकण्याचा संबंध येतो. पण अस्वस्थ वाटते. सामाजिक ऐक्याच्या संदर्भात, कर्मकांड आणि जुन्या प्रवृत्ती याच्या विरोधी भूमिका घेण्याची ज्यांच्याकडून अपेक्षा आहे, असे घटक जात, धर्म बघून भूमिका घेतात. सामाजिक ऐक्याला धक्का बसेल अशी भूमिका मांडतात. तेव्हा खऱ्या अर्थाने हा वारकरी संप्रदायाचा विचार नाही', असे शरद पवार म्हणाले.