Pune News : पुण्यातील व्यापाऱ्याला पाकिस्तानकडून जीवाला धोका, धमकीचे फोन; काय आहे कारण?

Boycott Turkish : जम्मू कश्मीरमधील पहलगाम येथील दहशतवादी हल्ल्यानंतर भारताने पाकिस्तानविरोधात कारवाई केली. तुर्कीने पाकिस्तानला लष्करी ड्रोन आणि शस्त्रास्त्रांची मदत पाठवून पाकिस्तानला खुले समर्थन दिले. यापूर्वी भारताने तुर्कीत भूकंप झाल्यानंतर मोठ्या प्रमाणावर मदत केली होती, पण तुर्कीने ती मदत विसरून भारताच्या विरोधात भूमिका घेतल्याने देशभरात नाराजी निर्माण झाली आहे.

या पार्श्वभूमीवर पुण्यात 'बॉयकॉट तुर्की' अभियान सुरू झाले असून पुण्यातील व्यापाऱ्यांनी तुर्कीच्या वस्तूंवर बहिष्कार टाकण्याचे आवाहन केले जात आहे. पुण्यातील व्यापाऱ्यांनी या मोहिमेला पाठिंबा देताना तुर्कीहून आयात होणारे सफरचंद आणणे थांबवले आहे. त्यामुळे स्थानिक बाजारपेठांमधून तुर्की सफरचंद गायब झाले आहेत. याचाच राग मनात धरून आता पाकिस्तानमधून पुण्यातील व्यापाऱ्यांना धमकीचे फोन येत असल्याचं समोर आला आहे.

पुण्यात दरवर्षी अंदाजे १ हजार ते १२०० कोटी रुपयांची सफरचंद विक्री होते. या व्यापारात आता मोठी घट झाली आहे. सफरचंद व्यापारी सुयोग झेंडे यांनी तुर्कीमधील सर्व फळांवर बहिष्कार टाकण्याचा निर्णय घेतला असून यापुढे तुर्कीहून कुठलेही फळ आयात न करण्याची भूमिका जाहीर केली आहे.

या निर्णयानंतर झेंडे यांना पाकिस्तानमधून धमकीचे फोन येऊ लागले असून, अज्ञात क्रमांकावरून त्यांना ठार मारण्याच्या धमक्या दिल्या गेल्या आहेत. पोलिसांनी या प्रकरणाचा तपास सुरू केला आहे. यासंदर्भात बोलताना झेंडे म्हणाले, "गेल्या काही दिवसांत तुर्की सफरचंदांची मागणी मोठ्या प्रमाणावर घटली आहे. नागरिकही या बहिष्कार मोहिमेत सामील झाले असून, तुर्कीच्या ऐवजी इतर देशांमधून सफरचंद खरेदी करत आहेत."