PDCC Bank : अजितदादांच्या निधनानंतर पुणे जिल्हा बँकेची पहिलीच निवडणूक : अधिकाऱ्यांचे आदेश धडकताच गुप्त हालचालींना सुरुवात

PDCC Bank : दिवंगत अजित पवार यांच्या निधनाला एक वर्ष पूर्ण होत असतानाचा त्यांचे प्राबल्य असणाऱ्या पुणे जिल्हा सहकारी बँकेच्या पंचवार्षिक निवडणुकीसाठी हालचाली सुरु झाल्या आहेत. जिल्ह्यात ठिकठिकाणी सहकारी सोसायटी संस्थांचे प्रतिनिधी निवडीचा ठराव करण्यास सुरुवात झाली आहे. आपल्या तालुक्यातून 'अ' गटातून संचालक होण्यासाठी बँकेच्या आजी-माजी पदाधिकाऱ्यांनी पडद्यामागून हालचाली सुरू केल्या आहेत.

अजित पवार यांच्या निधनाला 28 जानेवारी रोजी एक वर्ष पूर्ण होत आहे. त्याच जानेवारी महिन्यामध्ये जिल्हा बँकेची निवडणूक होत आहे. या निवडणुकीच्या पार्श्वभूमीवर निवडणूक निर्णय अधिकारी दिग्विजय आहेर यांनी २१ ऑगस्ट रोजी सर्व सहकारी सोसायटी सचिवांना ठराव पाठवण्याचे आदेश दिले आहेत. २२ सप्टेंबर ही ठराव पाठवण्याची अंतिम तारीख आहे. या ठरावाच्या निमित्ताने सर्व सहकारी संस्थांमध्ये मतदान होणार आहे. त्यामुळे संचालक मंडळाचे महत्व वाढले आहे.

ठराव पाठवण्याची निवडणूक म्हणजे संभाव्य संचालक मंडळाच्या दृष्टीने अंतिम सामन्यापूर्वीचा उपांत्य सामना आहे. सोसायटीमध्ये आपल्या विचाराचा ठराव असावा, यासाठी जिल्हा बँकेच्या आजी-माजी संचालक व तालुका पदाधिकाऱ्यांनी हालचाली सुरू केलेल्या आहेत. ठरावाच्या निमित्ताने अनेक सहकारी संस्था संचालकांमध्ये आपल्या विचाराचा प्रतिनिधी जाण्यासाठी तीव्र स्पर्धा लागणार आहे.

थकबाकीदार सोसायट्यांना धक्का

ठराव पाठवताना थकबाकीदार सोसायटीच्या अध्यक्ष व संचालकांना प्रतिनिधी म्हणून येण्याचा अधिकार राहिलेला नाही. त्याऐवजी संबंधित संस्थेचा थकबाकी नसलेल्या सभासदाला प्रतिनिधी म्हणून पाठवावे, असे अधोरेखित केले आहे. त्यामुळे अनेक दिग्गज संस्थाचालकांच्या प्रतिनिधींना जाता येत नसल्याने पंचाईत होऊन बसली आहे.

प्रतिनिधी जाताना आपल्याच कुटुंबातील पत्नी, मुलगा, मुलगी, नातेवाईक व जवळचा विश्वासू कार्यकर्ता यांचा ठराव पाठवण्यासाठी संस्थाचालक प्रयत्न करताना दिसतील, असा अंदाज आहे. दौंड तालुक्यामध्ये १२१ सहकारी संस्था असून, त्यापैकी फक्त तीन सोसायटींची १०० टक्के वसुली झाली आहे. या तीन संस्थांच्या संचालक मंडळापैकी प्रतिनिधी येताना दिसतील. इतर ठिकाणी सभासद प्रतिनिधी येणार आहेत.