Pune Graduate Constituency: 48 हजार मतांनी भाजपाच्या उमेदवाराला धूळ चारली, याची पुनरावृत्ती होणार का? काँग्रेसचा पुन्हा मास्टरस्ट्रोक

Pune News: आगामी विधान परिषद निवडणुकांच्या पार्श्वभूमीवर महाराष्ट्र प्रदेश काँग्रेस कमिटीनं (एमपीसीसी) आपल्या नेत्यांवर महत्त्वाच्या जबाबदाऱ्या टाकल्या आहेत. यातील एक महत्त्वाची नियुक्ती म्हणजे पुणे पदवीधर मतदारसंघासाठी पक्षाचे वरिष्ठ नेते आणि काँग्रेस वर्किंग कमिटीचे सदस्य माजी मंत्री बाळासाहेब थोरात यांची समन्वयकपदीची जबाबदारी सोपवण्यात आली आहे.

पुणे पदवीधर विभागाच्या मागच्या निवडणुकीत महायुतीच्या उमेदवाराचा तब्बल ४८ हजार मतांनी पराभव झाला होता. पदवीधर मतदारसंघात पुणे, पिंपरी चिंचवड, सोलापूर, सांगली, कोल्हापूर महापालिका, त्यांतील जिल्हा परिषदा आणि नगर परिषदा, पंचायत समित्यांचा समावेश आहे. काही दिवसांपूर्वीच भाजपने राजेश पांडे यांच्यावर या मतदारसंघाबाबतची महत्त्वाची जबाबदारी सोपवली होती, त्यानंतर आता काँग्रेसने देखील बाळासाहेब थोरात यांना मैदानात उतरवले आहे.

पुणे पदवीधर मतदारसंघ हा महाराष्ट्रातील सात प्रमुख पदवीधर मतदारसंघांपैकी एक असून, येथे पदवीधर मतदारांची संख्या मोठी आहे. सद्यस्थितीत काँग्रेससह महाविकास आघाडीला या मतदारसंघात मजबूत भूमिका घेण्याची गरज आहे. ही निवडणूक डिसेंबर २०२५ मध्ये होण्याची शक्यता असून, यासाठी पक्षाने आता जोरदार तयारी सुरू केली आहे. थोरात यांच्या या जबाबदारीमुळे काँग्रेसला पुणे विभागात नवीन ऊर्जा मिळेल, असे मत मतदारांमध्ये व्यक्त होत आहे.

विधानसभा निवडणुकीत पराभूत झाल्यानंतर काहिशा अलिप्त असलेल्या बाळासाहेब थोरात यांना पुन्हा पुणे पदवीधर मतदार संघाच्या निवडणुकीच्या निमित्ताने मैदानात उतरून काँग्रेसने मास्टर स्ट्रोक मारला असल्याचे देखील बोलले जात आहे. त्यामुळे काँग्रेसची मजबूत पकड असलेल्या पुणे पदवीधर मतदारसंघावर ती पुन्हा काँग्रेसचा झेंडा फडकवण्याची जबाबदारी थोरात यांच्याकडे असणार आहे.