Pune news : पुण्याच्या वस्तीगृहात घुमले 'ओ रे बंदूक वाले'चे सूर; गाण्यावरचा तो डान्स अन् थेट गुप्तचर यंत्रणांची एन्ट्री! नक्की काय घडलं?

Pune News : पुण्यातील एका वस्तीगृहामध्ये आयोजित कार्यक्रमांमध्ये सादर करण्यात आलेल्या गाण्यावरून वाद निर्माण होण्याची शक्यता वर्तवली जात आहे. कारण हे गाणं माओवाद्यांशी संबंधित असल्याचं सांगितलं जात आहे.

विश्रांतवाडी येथील भारतरत्न डॉ. बाबासाहेब आंबेडकर शासकीय वसतिगृहात डॉ. बाबासाहेब आंबेडकर यांच्या १३५व्या जयंतीनिमित्त आयोजित सांस्कृतिक कार्यक्रमात एका गटाने “ओ रे बंदूक वाले” या गाण्यावर नृत्य सादर केले. या गाण्यात माओवादी कमांडर मांडवी हिडमा याचे कथित गौरवगान असल्याच्या आरोपांमुळे प्रकरण चर्चेत आले आहे.

समाजकल्याण विभागाचे सहाय्यक आयुक्त विशाल लोंढे यांनी सांगितले की, क्रॉस इन्व्हेस्टिगेशन आणि पोलिसांसोबत केलेल्या तपासानुसार विद्यार्थ्यांनी हे गाणे अनवधानाने निवडले होते. कार्यक्रम पूर्णपणे सांस्कृतिक हेतूने आयोजित करण्यात आला होता. विद्यार्थ्यांनी विविध भागातील पारंपरिक पोशाख घालून नृत्य सादर करण्याची कल्पना केली होती. त्यांनी यूट्यूबवर गाणी शोधली आणि फक्त संगीत आवडल्यामुळे हे गाणे निवडले. गाण्याच्या आशयाची सखोल माहिती त्यांना नव्हती.

या कार्यक्रमासाठी कोणतीही पूर्वतयारी नव्हती. अवघ्या दहा मिनिटांत हे नृत्य ठरवण्यात आले होते. हा कार्यक्रम विद्यार्थ्यांनी स्वतःहून आयोजित केला होता आणि त्यासाठी अधिकृत परवानगी घेतली नव्हती. वसतिगृहात सुमारे एक हजार विद्यार्थ्यांची क्षमता आहे. सध्या परीक्षेनंतर ६०० ते ७०० विद्यार्थी उपस्थित आहेत. त्यापैकी ८५ टक्के विद्यार्थी अनुसूचित जाती प्रवर्गातील तर १५ टक्के इतर समाजातील आहेत.

घटनेची दखल घेत पोलिस आणि गुप्तचर यंत्रणा सतर्क झाल्या आहेत. अधिकाऱ्यांनी सर्व विद्यार्थ्यांना एकत्र बोलावून या प्रकाराचे गांभीर्य समजावून सांगितले. पुन्हा अशा चुकांपासून बचाव करण्यासाठी विद्यार्थ्यांचे समुपदेशन करण्यात आले आहे. काही विद्यार्थ्यांनी सांगितले की, “सेव ट्री” अर्थात झाडे वाचवा या संकल्पनेने हे गाणे निवडले होते. झाडांच्या बाबतीत हिडमा यांचे काम चांगले असल्याचे त्यांचे मत होते. मात्र, गाण्यातील माओवादी संदर्भाबाबत त्यांना पुरेशी जाणीव नव्हती.

प्रशासनाने या प्रकाराला राजकीय किंवा माओवादी आशय न देता केवळ अनवधानाची चूक म्हणून पाहिले आहे. तरीही पोलिसांनी वसतिगृहाला भेट देऊन विद्यार्थ्यांविषयी माहिती गोळा केली असून प्रकरणाची चौकशी सुरू आहे.