Pune News: आगामी महापालिका निवडणुकीच्या पार्श्वभूमीवर दोन्ही राष्ट्रवादी काँग्रेस एकत्र येणार याबाबत चर्चांना उधाण आले आहे. या चर्चानंतर राष्ट्रवादी काँग्रेस शरदचंद्र पवार पक्षाचे शहराध्यक्ष प्रशांत जगताप यांनी या भूमिकेशी फारकत घेत पक्षाने असा निर्णय घेतल्यास आपण काही काळासाठी राजकारण सोडू, असा निर्वाणीचा इशारा दिला होता.
पक्षाध्यक्ष शरद पवार यांची भेट घेऊन जगताप यांनी उपमुख्यमंत्री अजित पवार यांच्या पक्षासोबत न जाण्याचा निर्णय झाला असल्याचं सांगितलं होतं. मात्र त्यानंतर आता शहरातील इतर पदाधिकाऱ्यांनी शहराध्यक्षांच्या भूमिकेशी फारकत घेत एक वेगळा ठराव पास केला असल्याचं समोर आला आहे.
शहराध्यक्ष प्रशांत जगताप यांनी शरद पवार यांची भेट घेत अजित पवार यांच्या पक्षासोबत कोणत्याही प्रकारची आघाडी होणार नाही. आगामी निवडणुका या महाविकास आघाडी सोबतच लढणार असल्याचं स्पष्ट केलं होतं. त्यामुळे कुठेतरी दोन्ही राष्ट्रवादी काँग्रेस एकत्र येणार या चर्चेला पूर्णविराम लागला असल्याचं बोललं जात होतं.
मात्र शरद पवार यांच्या सोबत झालेल्या शहराध्यक्षांच्या भेटीनंतर पक्षाची बैठक पार पडली या बैठकीत मात्र सर्व पदाधिकाऱ्यांनी महाविकास आघाडी आणि उपमुख्यमंत्री अजित पवार यांच्या राष्ट्रवादीसोबत जाण्याबाबत चे दोन्ही पर्यायांवर विचार करून अंतिम निर्णय शरद पवारांनी घ्यावा, असा ठराव मंजूर केला आहे.
याबाबत बोलताना राष्ट्रवादी काँग्रेस शरदचंद्र पवार पक्षाचे नेते आणि माजी स्थायी समिती अध्यक्ष विशाल तांबे म्हणाले, "प्रशांत जगताप यांनी जाहीर केलेल्या निर्णय तो त्यांचा वैयक्तिक असू शकतो मात्र पुणे शहराचा निर्णय हा शरद पवार आणि खासदार सुप्रिया सुळे व प्रदेशाध्यक्ष शशिकांत शिंदे यांच्याकडून अधिकृतपणे येईल. पवार साहेब जो काही आदेश देतील तो आमच्यासाठी अंतिम असेल. मात्र आमच्या पक्षाच्या बैठकीमध्ये आम्ही आगामी महापालिका निवडणुकीमध्ये आघाडीसाठी दोन्ही पर्यायांचा विचार करण्यात यावा, असा ठराव मंजूर केला आहे.
अजित पवार यांच्या राष्ट्रवादीसोबत गेल्यानंतर आपलं नुकसान होईल याबाबतचा जो अहवाल प्रशांत जगताप यांनी शरद पवार यांच्या समोर मांडला तो त्यांचा वैयक्तिक अहवाल होता. पक्षातील इतर सर्व सदस्यांच तसेच मत आहे असे नाही. काही सदस्यांना अजित पवार यांच्यासोबत निवडणूक लढल्यास पक्षाला फायदाच होईल असं वाटत आहे. दोन्ही पर्यायांबाबत जो काही अंतिम निर्णय असेल तो प्रदेशाध्यक्ष आणि पक्षाचे अध्यक्ष घेतील असं विशाल तांबे म्हणाले.
प्रशांत जगताप आणि पक्षातील इतर पदाधिकाऱ्यांनी घेतलेली भूमिका या भिन्नभिन्न असल्याचं पाहायला मिळत आहे. त्यामुळे अजित पवारांच्या पक्षासोबत आघाडी करण्यावरून शरद पवारांच्या पक्षांमध्ये दुफळी निर्माण झाली आहे, अशी चर्चा राजकीय वर्तुळात सुरू आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.