Sharad Pawar : 'केंद्राच्या सहकार्याने भरवलेल्या ग्रंथ प्रदर्शनांमध्ये गोळवलकर गुरुजींचे साहित्य, पण आंबेडकरवादी...,' शरद पवारांनी व्यक्त केली खंत

Pune News, 25 Sep : केंद्र सरकारच्या सहकार्याने पुण्यात भरवल्या जाणाऱ्या ग्रंथ प्रदर्शनांमध्ये हिंदुत्ववादी विचारसरणीची, गोळवलकर गुरुजी यांचे साहित्य प्राधान्याने दिसते. मात्र, आंबेडकरवादी साहित्याला त्या ग्रंथ प्रदर्शनांमध्ये स्थान नसते, ही खेदाची गोष्ट आहे.

असं वक्तव्य राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी केलं आहे. ते पुण्यातील बालगंधर्व रंगमंदिरात बोलत होते. माजी आमदार जयदेव गायकवाड यांच्या पुढाकाराने स्थापन केलेल्या डॉ. बाबासाहेब आंबेडकर सोशल रिसर्च सेंटरचे उद्घाटन शरद पवार यांच्या हस्ते करण्यात आलं.

यानिमित्त आयोजित कार्यक्रमात बोलताना त्यांनी संविधानाचा पाया भक्कम असल्यामुळेच आपल्याला भूमिका मांडण्याचा अधिकार असून संविधानामुळेच भारत एकसंध असल्याचं म्हटलं. तसंच यावेळी त्यांनी केंद्र सरकारच्या सहकार्याने भरवल्या जाणाऱ्या ग्रंथ प्रदर्शनांमध्ये हिंदुत्ववादी विचारसरणी आणि गोळवलकर गुरुजींचे साहित्य दिसते.

मात्र, आंबेडकरवादी किंवा समतावादी चळवळीतल्या साहित्याला तिथे स्थान नसते ही खेदाची गोष्ट आहे. ते म्हणाले, 'डॉ. बाबासाहेब आंबेडकर यांच्या नावाने सामाजिक संशोधन केंद्राचे उद्घाटन होतंय, ही सकारात्मक गोष्ट असून संविधानामुळेच भारत एकसंध आहे.

देशापुढील आव्हाने गंभीर होत आहेत. अनेक विचारांचे भुमिकांचे लोक संसदेत आहेत. कधीकधी चिंता वाटावी असे चित्र दिसते. निर्णय घेण्याचे व्यासपीठ बाजूला ठेवून निर्णय घेतले जातात. मात्र, संविधानाच्या चौकटीबाहेर जाता येत नसल्याने अनेकदा त्यांचा भ्रमनिरास होतो. संविधान हे देशातील प्रत्येक समस्येचं उत्तर आहे.'

तसंच यावेळी त्यांनी पाकिस्तान, श्रीलंका, नेपाळ, बांगलादेश या देशांमध्ये अस्थिरतेचे वातावरण असल्याचा दाखला देत भारत एकसंध व प्रगतीच्या पथावर असण्यामध्ये डॉ. बाबासाहेब आंबेडकरांचे संविधान व त्यातील लोकशाही मूल्यांचं महत्वाचं योगदान असल्याचंही म्हटलं.