Pune : ‘त्या’ दोघांमुळे लोकसभेतील 500 खासदारांचा कार्यक्रमच आटोपला असता...

Supriya Sule : संसदेमध्ये झालेल्या घुसखोरी प्रकरणावरून राष्ट्रवादी काँग्रेस शरद पवार गटाच्या खासदार सुप्रिया सुळे यांनी पुन्हा एकदा केंद्र सरकारवर टीका केली आहे. सध्याच्या सरकारच्या काळात कायदा आणि सुव्यवस्थेचा प्रश्न निर्माण झाल्याची नाराजी त्यांनी व्यक्त केली.

पुणे दौऱ्यादरम्यान खासदार सुप्रिया सुळे यांनी प्रसार माध्यमांशी संवाद साधला. यावेळी सुळे म्हणाल्या, संसदेमध्ये ज्या दिवशी घुसखोरी झाली, त्या दिवशी पुणे जिल्ह्यातील राष्ट्रवादी काँग्रेसचे दोन खासदार तेथे उपस्थित होते. मात्र याबद्दल आता कोणीही प्रश्न विचारत नसून सगळ्यांना या हल्ल्याचा विसर पडला आहे का?

सुळे पुढे म्हणाल्या, संसदेवर घुसखोरी झाली, त्या घुसखोरांकडे जर स्फोटके असती, जो तो धूर त्यांनी सोडला तो विषारी अला असता अथवा हा आत्मघातकी हल्ला असता तर 500 खासदारांचा कार्यक्रमच आटोपला असता. या प्रकारानंतर अद्यापही केंद्र सरकार याबत गंभीर नाही, असेच दिसत आहे. संसद भवन देशातील सर्वांत महत्त्वाची इमारत आहे. या ठिकाणी पंतप्रधानांपासून देशातील सर्वांत महत्त्वाच्या पदांवर काम करणारे लोक असतात. या ठिकाणी अशा प्रकारची घुसघोरी होणे हे चिंताजनक आहे. त्यामुळे देशभरातील कायदा आणि सुव्यवस्थेचा प्रश्न पुन्हा एकदा ऐरणीवर आला आहे.

नुकताच जम्मू आणि काश्मीरमध्ये देखील जवानांवर हल्ला झाला. अशा प्रकारचे हल्ले होत असताना सरकार मात्र महागाई, बेरोजगारीबाबत लोकसभेत आवाज उठविणाऱ्या खासदारांचे निलंबन करत आहे, अशी टीका सुप्रिया सुळे यांनी केली. संसदेचे हिवाळी अधिवेशन सुरू असताना दिल्लीत काही युवकांनी घुसखोरी केली होती. यातील दोन जणांनी लोकसभेतील गॅलरीतून सभागृहात उड्या मारल्या होत्या. त्यातील एकाने बुटातून धुराची नळकांडीही फोडली होती. खासदारांनी या घुसखोरांना पकडत सुरक्षा रक्षकांच्या ताब्यात दिले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

संसदेच्या परिसरातही काही तरूणांनी याच वेळी निदर्शने केली. याप्रकरणातील जवळपास सर्वच आरोपींना आता पोलिसांनी अटक केली आहे. घुसखोरी करणाऱ्यांजवळ असलेले पुरावे त्यांच्या एका साथीदाराने नष्ट केले आहे. या घटनेनंतर संसद भवनाच्या सुरक्षेची जबाबदारी आता केंद्रीय औद्योगिक सुरक्षा दलाकडे सोपविण्यात आली आहे. घुसखोरी प्रकरणावरून विरोधी पक्षांनी सरकारला लक्ष्य केले आहे. जे सरकार संसदेची सुरक्षा करू शकत नाही, ते देशाच्या सुरक्षेची जबाबदारी कशी सांभाळणार अशी चौफेर टीका सरकारवर होत आहे. अशातच राष्ट्रवादी काँग्रेस शरद पवार गटाच्या नेत्या खासदार सुप्रिया सुळे यांनीही सरकारवर टीका केली आहे.

Edited by : Prasannaa Jakate