Supriya Sule News : सुप्रिया सुळे भाऊबीजेला काटेवाडीत अजित पवारांच्या घरी जाणार

Baramati News : राष्ट्रवादी काँग्रेसमधील फुटीनंतर गोविंदबागेतील पहिल्याच दिवाळी पाडव्याला उपमुख्यमंत्री अजित पवार हे आज (ता. १४ नोव्हेंबर) अनुपस्थित राहिले. ज्येष्ठ नेते शरद पवार आणि खासदार सुप्रिया सुळे हे नेहमीप्रमाणे राज्यातील नागरिकांना भेटले. मात्र, अजितदादांची अनुपस्थिती प्रकर्षाने जाणवली. पाडव्याच्या कार्यक्रमाला अजित पवार अनुपस्थित राहिले असले तरी खासदार सुप्रिया सुळे या मात्र उद्या काटेवाडीत होणाऱ्या भाऊबीजेला जाणार आहेत. या घरगुती कार्यक्रमाला शरद पवारही उपस्थित राहणार का, याकडे सर्वांचे लक्ष असणार आहे. (Supriya Sule will go to Ajit Pawar's house in Katewadi for bhaubeej)

पवार कुटुंबीय हे दरवर्षी दिवाळी पाडव्याला राज्यातील नागरिकांना गोविंदबागेत भेटत असतात. आजपर्यंत शरद पवार, अजित पवार, सुप्रिया सुळे आणि गेल्या काही वर्षांपासून रोहित पवार हे लोकांच्या शुभेच्छा स्वीकारत असत. यंदा प्रथमच गोविंदबागेत अजित पवारांविना दिवाळी पाडवा झाला. अजित पवारांनी वेगळी भूमिका घेत भाजप-शिवसेनेसोबत जात युती सरकारमध्ये उपमुख्यमंत्री झाले. शरद पवार आणि सुप्रिया सुळे हे मात्र आपल्या भूमिकेवर ठाम राहिले. त्यामुळे वेगळी राजकीय भूमिका घेणारे अजित पवार हे आज पाडव्याच्या कार्यक्रमापासूनही दूरच राहिले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

पाडव्यानंतर पवार कुटुंबीयांची भाऊबीज ही बारामती तालुक्यातील काटेवाडीत येथे अजित पवार यांच्या घरी असते. या ठिकाणी संपूर्ण पवार कुटुंबीय एकत्र येतात. अजित पवार यांनी आज दिवाळी पाडव्याला अनुपस्थित राहिले असले तरी खासदार सुप्रिया सुळे यांनी मात्र आपण काटेवाडीत भाऊबीजेला जाणार असल्याचे सांगितले आहे, त्यासाठी त्यांनी राजकीय भूमिका वेगळी आणि कौटुंबिक संबंध वेगळे असे अनेकदा स्पष्ट केले आहे. त्यानुसार सुळे या उद्या काटेवाडीत भाऊबीजेला जाणार आहेत.

दरम्यान, भाऊबीजेला दरवर्षी पवार कुटुंबीय एकत्र येतात. पण आजारपणामुळे आपण दिवाळी पाडव्याला येऊ शकणार नाही, असे सांगणारे अजित पवार उद्या भाऊबीजेला उपस्थित राहणार का, असा सवाल उपस्थित होत आहे. त्याचबरोबर शरद पवार हेही या घरगुती कार्यक्रमाला उपस्थित राहतात की नाही, हेही पाहावे लागेल.