23 September in History : 'ती' भाजप शिवसेनेच्या मनभेदाची सुरुवात होती?

Political Events on 23 September: राज्यात पुन्हा विधानसभा निवडणुकांचे वारे वाहू लागले आहेत. गेल्या पाच वर्षांत खूप पाणी पुलाखालून वाहून गेलं. शिवसेनेचे दोन भाग पडले तसे राष्ट्रवादी काँग्रेसचेही. आता तीन पक्षांची महायुती आणि तीन पक्षांची महाविकास आघाडी यांच्यात राजकीय बुद्धीबळ सुरु आहे.

स्व. शिवसेना प्रमुख हयात असताना भाजप-शिवसेना युती अखंड होती. स्व. प्रमोद महाजनांसारखे नेते या युतीत दरी पडणार नाही, याची काळजी घ्यायला भक्कम होते. पण नंतर राजकारणच बदललं. 2012 मध्ये बाळासाहेबांचं निधन झालं. याच काळात शिवसेनेची महत्त्वाकांक्षा वाढत असल्याचे तेव्हाच्या बातम्यांवरुन दिसते.

2014 मध्ये भाजप-शिवसेना यांच्यात मनभेद सुरु झाल्याचे तेव्हाच्या बातम्यांवरुन दिसते. दहा वर्षांपूर्वी म्हणजेच 23 सप्टेंबर 2014 रोजी प्रसिद्ध झालेल्या 'सकाळ'मधली मुख्य बातमी हीच होती....पूर्वी राष्ट्रवादी मध्ये असलेले संजय सावकारे हे एकनाथ खडसे यांच्या उपस्थितीत भाजपमध्ये प्रवेश करत असल्याचेही वृत्त त्या दिवशी प्रसिद्ध झाले होते....काय होत्या या दोन बातम्या......

दिनविशेष - 23 सप्टेंबर

1873 : महात्मा ज्योतिबा फुले यांनी सत्यशोधक समाजाची स्थापना केली.

1884 : महात्मा फुले यांचे सहकारी रावबहादूर नारायण मेघाजी लोखंडे यांनी "बॉंबे मिल हॅंड्‌स असोसिएशन' नावाने गिरणी कामगारांची संघटना स्थापना केली. भारतातील संघटित कामगार चळवळीची ही सुरवात होय.

1908 : हिंदीतील कवी व लेखक, ज्ञानपीठ पुरस्कार विजेते रामधारी सिंह "दिनकर' यांचा जन्म. भागलपूर विद्यापीठाच्या कुलगुरुपदाची जबाबदारी त्यांनी सांभाळली. केंद्रीय गृहमंत्रालयाचे ते हिंदी भाषाविषयक सल्लागार होते.

1950 : गडचिरोली जिल्ह्यातील आदिवासी क्षेत्रात उल्लेखनीय वैद्यकीय सेवाकार्य करणारे डॉ. अभय बंग यांचा जन्म. त्यांना "महाराष्ट्र भूषण' पुरस्काराने गौरविण्यात आले.

भारतीय संसद सदस्य संघटनेतर्फे "सत्पाल मित्तल स्मृती पुरस्कार' डॉ. बंग यांच्या "सर्च' या संस्थेला मिळाला. "सर्च' या स्वयंसेवी संस्थेने नवजात मुलांचे आरोग्य या विषयावर आजपर्यंत जे सखोल संशोधन आणि प्रयोग केले आहेत त्याचा सन्मान जागतिक पातळीवर विशेषांक काढून करण्यात आला. "नेचर' या जगप्रसिद्ध प्रकाशनाने "निओनेट्‌स इन गडचिरोली' या नावाने विशेषांक काढून "ग्लोबल हेल्थ कौन्सिल'च्या जागतिक संमेलनात उपलब्ध करून दिला.

1992 : भारतीय कम्युनिस्ट पक्षाचे सरचिटणीस इंद्रजित गुप्ता "उत्कृष्ट संसदपटू'साठीचा "गोविंद वल्लभ पंत पुरस्कार' पंतप्रधान पी. व्ही. नरसिंह राव यांच्या हस्ते प्रदान.

2009 : भारतीय अवकाश कार्यक्रमाला यशाचीच नवनवी शिखरे दाखविणाऱ्या ध्रुवीय उपग्रह प्रक्षेपकाने (पीएसएलव्ही) सतीश धवन अवकाश केंद्राच्या पहिल्या ‘लॉँच पॅड’वरून सलग पंधरावे उड्डाण यशस्वी करत ‘ओशनसॅट २’सह सहा ‘नॅनोसॅटेलाइट’ला ध्रुवीय सूर्यस्थिर कक्षेत नेऊन ठेवले.