मोठी बातमी : आशिष शेलार यांना राष्ट्रीय स्तरावर संधी; जय शहांचा पुढाकार

मुंबई : केंद्रीय गृहमंत्री अमित शहा (Amit Shah) यांचे चिरंजीव आणि भारतीय क्रिकेट बोर्डाचे विद्यमान सचिव जय शहा (Jay Shah) यांच्या सूचनेनंतर मुंबई भाजपचे अध्यक्ष आशिष शेलार (Ashish Shelar) यांनी आपला मुंबई क्रिकेट असोसिएशनच्या अध्यक्षपदासाठी भरलेला उमेदवारी अर्ज माघारी घेतला. जय शहा यांनी सांगितल्यानुसार शेलार यांनी बीसीसीआयच्या खजिनदारपदासाठी आपला उमेदवारी अर्ज दाखल केला आहे. (Ashish Shelar's candidature for BCCI treasurer filed)

आशिष शेलार यांनी मुंबई क्रिकेट असोसिएशनच्या निवडणुकीत पवार-शेलार पॅनेलकडून अध्यक्षपदासाठी उमेदवारी अर्ज भरला होता. मात्र, काही तासांतच त्यांना बीसीसीआयमध्ये खजिनदारपदासाठी अर्ज दाखल करण्यास सांगण्यात आले, त्यासाठी जय शहा यांनी पुढाकार घेतल्याचे सांगितले जात आहे. शहा यांच्या सूचनेनंतर शेलार यांनी एमसीएच्या अध्यक्षपदासाठी दाखल केलेला अर्ज मागे घेतला आणि बीसीसीआयच्या खजिनदारपदासाठी अर्ज भरला.

दरम्यान, बीसीसीआय आणि मुंबई क्रिकेट संघटनेत नियमाप्रमाणे एकाच वेळी दोन पदांवर राहता येत नाही. त्यामुळे मी ‘एमसीए’च्या अध्यक्षपदाच्या निवडणुकीतून उमेदवारी अर्ज मागे घेतला आहे. पवार-शेलार पॅनेलकडून अमोल काळे हे अध्यक्षपदाची निवडणूक लढवतील. दीपक पाटील हे आमच्या पॅनेलचे उमेदवार जॉईंट सेक्रेटरी (संयुक्त सचिव) पदावर बिनविरोध निवडून आले आहेत. पवार-शेलार पॅनलसाठी ही सुवार्ता आहे. तसेच, विहंग सरनाईक हेदेखील बिनविरोध निवडून येतील, यासाठी आम्ही प्रयत्नशील आहोत, असे आमदार आशिष शेलार यांनी स्पष्ट केले.

मुंबई क्रिकेट असोसिएशनच्या निवडणुकीत अमोल काळे यांच्यासाठी आमदार आशिष शेलार यांच्याशी चर्चा करावी लागली. ज्येष्ठ नेते शरद आणि आशिष शेलार यांच्यात आज दुपारी चर्चा झाली. त्यानंतर शेलार यांनी काळे यांच्या नावाची घोषणा केली. काळे हे उपमुख्यमंत्री देवेंद्र फडणवीस यांचे निकटवर्तीय मानले जातात. त्यामुळे मुंबई क्रिकेट असोसिएशनच्या निवडणुकीत शरद पवार यांनी फडणवीस यांच्या विश्वासू सहकाऱ्याच्या पाठीशी आपली ताकद उभी केल्याची चर्चा रंगली आहे.