पंजाबमध्ये राजकीय भूकंप : सिद्धूंच्या नंतर तासाभरातच काँग्रेसला आणखी एक झटका

नवी दिल्ली : पंजाबचे (Punjab) माजी मुख्यमंत्री (Chief Minister) अमरिंदरसिंग हे काँग्रेसला धक्का देणार असल्याची चर्चा सुरू आहे. ही चर्चा सुरू असतानाच काँग्रेसचे प्रदेशाध्यक्ष नवज्योतसिंग सिद्धू (Navjot Singh Sidhu) यांनी पक्षाला मोठा धक्का दिला आहे. त्यांनी प्रदेशाध्यक्षपदाचा तडकाफडकी राजीनामा दिला आहे. त्यांच्या राजीनाम्यानंतर आता काँग्रेसचे खजिनदार गुलजार इंदर चहल हेसुद्धा पायउतार झाले आहेत. यामुळे पंजाब काँग्रेसमध्ये राजकीय भूकंप झाला आहे.

सिद्धू यांनी पक्षाच्या अध्यक्षा सोनिया गांधी यांना दोन ओळीचा राजीनामा पाठवला आहे. तडजोड केल्यानंतर माणसाच्या व्यक्तिमत्वाचा ऱ्हास सुरू होते. मी पंजाबचे भविष्य आणि कल्याण यासोबत तडजोड करणार नाही. यामुळे पंजाब काँग्रेस प्रदेश समितीच्या अध्यक्षपदाचा राजीनामा देत आहे. मी काँग्रेस सेवा करीत राहीन, असे सिद्धू यांनी राजीनामापत्रात म्हटले आहे. यामुळे ते काँग्रेस सोडणार नसल्याचे संकेत मिळत आहेत.

सिद्धू यांनी राजीनामा देताच तासाभरात काँग्रेसचे खजिनदार गुलजार इंदर चहल यांनी पदाचा राजीनामा दिला आहे. यामुळे काँग्रेसला लगेचच दुसरा धक्का बसला आहे. एकाच दिवशी दोन बड्या नेत्यांनी पक्षाला धक्का दिल्याने काँग्रेसमध्ये खळबळ उडाली आहे. विशेष म्हणजे चहल यांची सातच दिवसांपूर्वी खजिनदारपदी निवड करण्यात आली होती. चहल हे लोकप्रिय पंजाबी अभिनेते व निर्माते आहेत. दरम्यान, काँग्रेस नेतृत्वाने याची दखल घेऊन पक्षाचे प्रभारी आणि निरीक्षकांना तातडीने पंजाब काँग्रेसच्या स्थितीचा आढावा घेण्याचा निर्देश दिला आहे, अशी माहिती सूत्रांनी दिली.

तत्कालीन मुख्यमंत्री अमरिंदरसिंग आणि नवज्योतसिंग सिद्धू यांच्यात मागील 2017 च्या विधानसभा निवडणुकीपासून वाद सुरू आहे. भाजपमधून काँग्रेसमध्ये आलेल्या सिद्धू यांनी काँग्रेसच्या विजयानंतर पंजाबमध्ये उपमुख्यमंत्रिपद मिळेल, अशी शक्यता होती. परंतु, अमरिंदरसिंग यांनी याला विरोध केल्याने सिद्धू यांना दुसरे मंत्रालय देण्यात आले होते. तेव्हापासून दोघांचा वाद सुरू असून, आता सिद्धू यांनी उघड बंड पुकारले होते.

पंजाबमधील अंतर्गत वाद विधानसभा निवडणुकीआधी पक्षाला परवडणारा नसल्याने नेतृत्वाने पावले उचलली होती. सिद्धू यांनी प्रदेशाध्यक्षपद मागितले होते. पक्षाने मात्र, त्यांना प्रचारप्रमुखाची जबाबदारी देण्याची तयारी दर्शविली होती. सिद्धू हे प्रदेशाध्यक्षपदावर ठाम होते. अखेर सिद्धू यांची मागणी पक्षाच्या नेतृत्वाने मान्य केली होती. विद्यमान प्रदेशाध्यक्ष सुनील जाखड यांना हटवले गेले. सिद्धू यांच्यासोबत चार कार्यकारी अध्यक्ष पक्षाने दिले होते.