MLA Resignation : पदाचा राजीनामा देत पक्ष सोडणारे सहा आमदार फसणार? निवडणूक आयोगाकडे धाव घेत पक्षानेच केली कोंडी

Tamil Nadu politics : तामिळनाडूच्या विधानसभा निवडणुकीच्या निकालानंतर राज्यात सत्तांतर झाले आणि सुपरस्टार विजय यांचा टीव्हीके पक्ष सत्तेत आला. सत्तास्थापनेवेळी झालेल्या राजकारणानंतर विरोधी पक्ष असलेल्या अण्णाद्रमुक पक्षात सध्या बंडाचे वारे वाहत आहेत. यापूर्वीच सुमारे २५ हून अधिक आमदारांनी मुख्यमंत्री विजय यांच्या सरकारला विश्वासदर्शक ठरावावेळी पाठिंबा दिला आहे.

सत्तास्थापनेनंतर अण्णाद्रमुकच्या सहा आमदारांनी तकडाफडकी राजीनामे दिले आहे. पक्षातील आणखी काही आमदार राजीनामा देण्याची शक्यता आहे. एकीकडे या चर्चा सुरू असतानाच या रिक्त जागांसाठी केंद्रीय निवडणूक आयोगाकडून पोटनिवडणूक जाहीर केली जाण्याची शक्यता आहे. यापार्श्वभूमीवर एआयएडीएमके पक्षाने तातडीने आयोगाकडे धाव घेतली.

पक्षाचे खासदार आय. एस. इन्बादुराई यांनी याबाबत माहिती देताना सांगितले की, तमिळनाडूमध्ये घोडेबाजार सुरू असल्याने खूप गंभीर परिस्थिती निर्माण झाली असल्याची तक्रार निवडणूक आयोगाकडे केली आहे. त्यानुसार आम्ही २०२६ च्या निवडणुकीवेळी जिंकलेल्या सहा जागांसाठी पोटनिवडणूक जाहीर करू नये, अशी मागणी केली आहे.

सहा आमदारांनी स्वेच्छेने पदाचा राजीनामा दिला आहे. ते असंविधानिक पध्दतीने टीव्हीके पक्षात गेले आहेत. त्याआधीच आम्ही विधानसभा अध्यक्षांकडे त्यांना अपात्र करण्यासाठी तक्रार दिली आहे. मद्रास हायकोर्टातही स्वतंत्र याचिका दाखल केली आहे. त्याबाबतची कार्यवाही सुरू आहे. त्यामुळे कोर्टाचा अंतिम निकाल येईपर्यंत पोटनिवडणूक जाहीर करू नये, अशी मागणी आयोगाकडे केल्याचे इन्बादुराई यांनी सांगितले.

अण्णाद्रमुक पक्षाने आयोगाकडे तक्रार करत सहा माजी आमदारांना अडचणीत आणल्याची चर्चा आहे. त्यामुळे आता निवडणूक आयोग याबाबतीत काय निर्णय घेणार, याकडे लक्ष लागले आहे. आयोगाने पोटनिवडणूक जाहीर केल्यास त्याचा थेट फायदा टीव्हीकेला होणार आहे. या जागांवर संबंधित आमदार टीव्हीकेच्या चिन्हावर उमेदवार असतील. सध्याची राजकीय स्थिती पाहता ते सहाही जण पुन्हा निवडून येऊ शकतात. असे झाल्यास टीव्हीकेची विधानसभेतील ताकद वाढणार आहे.