Ram Mandir FIR : अयोध्येतील राम मंदिरात देणगी अपहारप्रकरण; ‘श्रीराम ट्रस्ट’ची मोठी कारवाई; 8 जणांविरोधात FIR दाखल

Ram Mandir Donation Scam : अयोध्येतील राम मंदिर येथील देणगी व्यवस्थापनावरून मोठा वाद समोर आला असून कथित आर्थिक अपहार प्रकरणात आता अधिकृत गुन्हा दाखल करण्यात आला आहे.

विशेष तपास पथकाच्या (SIT) प्राथमिक अहवालानंतर आठ आरोपींसह काही अज्ञात व्यक्तींविरुद्ध एफआयआर नोंदवण्यात आल्याने या प्रकरणाने राष्ट्रीय पातळीवर खळबळ उडाली आहे.

मिळालेल्या माहितीनुसार, श्रीराम जन्मभूमी तीर्थक्षेत्र ट्रस्टचे सदस्य कृष्ण मोहन यांनी दिलेल्या तक्रारीच्या आधारे पोलिसांनी (Police) ही कारवाई केली. एसआयटीने प्राथमिक तपासात काही गंभीर अनियमितता आढळल्याचा अहवाल दिल्यानंतर ट्रस्टने थेट गुन्हा दाखल करण्याची मागणी केली होती.

या प्रकरणात रामाशंकर यादव उर्फ टिन्नू, अविनाश शुक्ला, अनुकल्प मिश्रा, मनीष यादव, रामाशंकर मिश्रा, सुभाष आणि करुणेश यांच्यासह एका अज्ञात व्यक्तीवर गुन्हा (Crime) दाखल करण्यात आला आहे. उत्तर प्रदेश सरकारच्या निर्देशानुसार भारतीय न्याय संहितेच्या (BNS) विविध कलमांखाली हा गुन्हा नोंदवण्यात आला असून त्यात विश्वासघात, फसवणूक आणि गुन्हेगारी कट रचल्याचे गंभीर आरोप करण्यात आले आहेत.

सूत्रांच्या माहितीनुसार, मंदिरात जमा झालेल्या देणग्यांच्या व्यवहारात आर्थिक गैरव्यवहार झाल्याचा संशय व्यक्त करण्यात आला होता. या पार्श्वभूमीवर उत्तर प्रदेश सरकारने 13 जून रोजी विशेष तपास पथकाची स्थापना केली होती. एसआयटीच्या प्राथमिक तपासात काही महत्त्वाचे पुरावे समोर आल्यानंतर गुन्हा दाखल करण्याची शिफारस करण्यात आली.

या संपूर्ण प्रकरणात मुख्यमंत्री स्तरावरून थेट निर्देश देण्यात आल्याची माहिती समोर येत आहे. त्यानंतर प्रशासनाने तातडीने कारवाई करत एफआयआर दाखल केला. देशभरातील करोडो रामभक्तांच्या श्रद्धेचे केंद्र असलेल्या अयोध्येतील राम मंदिरातील देणगी व्यवहारांवर प्रश्नचिन्ह निर्माण झाल्याने या प्रकरणाकडे आता संपूर्ण देशाचे लक्ष लागले आहे.