Lawrence Bishnoi Gang : झिशान सिद्दिकींना भेटलेले खासदार बिश्नोई गँगच्या टार्गेटवर; काय आहे कारण?

New Delhi News : राष्ट्रवादी काँग्रेसचे नेते बाबा सिद्दीकी यांच्या हत्येनंतर बिहारमधील अपक्ष खासदार पप्पू यादव यांनी लॉरेन्स बिश्नोई गँगला थेट आव्हान दिले होते. तीन दिवसांपूर्वी यादव यांनी मुंबईत आमदार झिशान सिद्दीकी यांचीही भेट घेतली. त्यानंतर आता यादव हे बिश्नोई गँगच्या टार्गेटवर आले आहेत.

बाबा सिद्दीकी यांची हत्या बिश्नोई गँगने केल्याचे स्पष्ट झाले आहे. सिद्दीकी कुटुंबीय मुळचे बिहारचे असल्याने खासदार पप्पू यादव घटनेनंतर चांगलेच भडकले होते. त्यांनी बिश्नोईचा खात्मा करण्याची भाषा केली होती. त्यानंतर झिशान आणि अभिनेता सलमान खान यांना भेटण्यासाठी तीन दिवसांपूर्वी मुंबईत आले होते.

मुंबईत यादव यांनी झिशान यांची भेट घेतली. मात्र सलमान खानसोबत बेट झाली नाही. त्याच्याशी फोनवर बोलणे झाल्याचा दावा यादव यांनी केला आहे. या भेटीनंतर यादव यांना बिश्नोई गँगकडून धमकी आली आहे. काही वृत्तपत्रांमधून माहिती मिळाली की मागील काही दिवसांपासून बिश्नोईभाई विरोधात उलटसुलट बयान करत आहे. औकादीत रहा. राजकारणावर लक्ष द्या. टीआरपी कमवण्याच्या नादात पडू नका नाहीतर रेस्ट इन पीस करू, अशी धमकी यादव यांना मिळाली आहे.

पप्पू यादव यांना आलेल्या धमकीची ऑडिओ क्लिप व्हायरल होत आहे. या धमकीनंतर यादव यांनी बिहार पोलिसांकडे सुरक्षेची मागणी केली आहे. त्यांनी झेड दर्जाच्या सुरक्षेची मागणी केली आहे. सुरक्षा मिळाली नाही तर माझी कधीही हत्या होऊ शकते. त्याला केंद्र आणि राज्य सरकार जबाबदार असेल, यादव यांनी म्हटले आहे.

काय म्हणाले होते पप्पू यादव?

बाबा सिद्दिकींच्या हत्येनंतर पप्पू यादव यांनी बिश्नोईवर वादग्रस्त विधान केले होते. यादव म्हणाले होते की, ‘कायद्याने परवानगी दिली तर 24 तासांत बिश्नोईसारख्या गुन्हेगारांचे पूर्ण नेटवर्क संपवून टाकेन.’ त्यानंतर आता बिश्नोई गँगने त्यांनाच जीवे मारण्याची धमकी दिली आहे.