BJP Gift for Muslims : मुस्लिमांसाठी भाजपचा मोठा प्लॅन; पक्षाने केली ‘सौगात-ए-मोदी’ची घोषणा...

New Delhi News : महाराष्ट्रासह देशभरातील अनेक भाजप नेत्यांकडून वादग्रस्त विधाने केली जात आहे. यापार्श्वभूमीवर भाजपने रमझान ईदचे निमित्त साधून मोठी घोषणा केली आहे. भाजपने उचललेले हे पाऊल ऐतिहासिक मानले जात आहे. देशभरातील गरीब मुस्लिमांना ईदनिमित्त सौगात-ए-मोदी हे किट देण्याची घोषणा करण्यात आली आहे. यामध्ये तब्बल 32 लाख मुस्लिमांना किट दिले जाणार आहे.

भाजपच्या अल्पसंख्यांक मोर्चाकडून ही मोहिम हाती घेण्यात आली आहे. याअंतर्गत पक्षाचे 32 हजार पदाधिकारी 32 हजार मशिदींशी संपर्क साधून गरीब मुस्लिमांपर्यंत किट पोहचविण्याची व्यवस्था केली जाणार आहे. मुस्लिम कुटुंबाला ईदनिमित्त भेट म्हणून हा पाऊल उचलण्यात आल्याचे सांगितले जात आहे.

सौगात-ए-मोदी किट काय आहे?

सौगात-ए-किट ही गरीब मुस्लिमांसाठी एक भेट असेल. त्यामध्ये ईद साजरी करण्यासाठी आवश्यक साहित्य असणार आहे. शेवया, खजूर, सुकामेवा, बेसन, तूप-डालडा, महिलांसाठी सुती कपडे यांसह इतर काही आवश्यक वस्तूंचाही किटमध्ये समावेश असू शकतो. ही योजना मुस्लिम कुटुंबासाठी ईदचा आनंद वाढवणारी ठरेल, असे भाजपचे म्हणणे आहे.

भाजपची ही मोहिम आजपासून (ता. 25 मार्च) सुरू करण्यात आली आहे. याची सुरूवात नवी दिल्लीतील गालिब अकादमीतून होणार आहे. त्यामध्ये भाजपचा एक कार्यकर्ता 100 लोकांशी संपर्क साधेल. बिहारमध्ये सध्या निवडणुकीचे वारे वाहत आहे. यापार्श्वभूमीवर बिहारसाठी हे अभिमान राबवले जात असल्याची चर्चा सुरू झाली आहे. पण बिहारसह इतर राज्यांमध्येही हे अभियान राबवले जाणार आहे.

भाजपचे नेते नीरज कुमार यांनी सांगितले की, काही दलाल आणि ठेकेदारांच्या कचाट्यातून मुस्लिम समाजाला आता बाहेर आणायचे आहे. नरेंद्र मोदींनी मुस्लिमांसाठी ईदी योजना, उस्ताद योजना चालवली. तीन तलाक सारख्या प्रथा समाप्त केल्या. पण तरीही आम्हाला त्यांची मते मिळाली नाहीत. काही शिक्षित मुस्लिम युवक आणि महिलांनी लोकसभेला मोदींना मतदान केले होते.