MLC Election : तेलंगणातील निवडणुकीत भाजपकडून काँग्रेसला मोठा धक्का; पंतप्रधान मोदींनीही थोपटली पाठ...

New Delhi News : हरियाणा, महाराष्ट्र आणि दिल्लीतील ऐतिहासिक विजयानंतर भाजपने दक्षिणेतही काँग्रेसला धक्का दिला आहे. काँग्रेसची सत्ता असलेल्या तेलंगणामध्ये भाजपने विधान परिषदेच्या निवडणुकीत मोठे यश मिळवले आहे. तीन जागांसाठी झालेल्या निवडणुकीत भाजपला दोन जागांवर मोठा विजय मिळाला आहे. काँग्रेसच्या पदरात केवळ एकच जागा पडली आहे.

निवडणुकीच्या निकालानंतर पंतप्रधान नरेंद्र मोदींनी भाजप कार्यकर्त्यांची पाठ थोपटली आहे. त्यामुळे भाजपसाठी या विजयाचे महत्व किती आहे, हे अधोरेखित झाले आहे. तेलंगणासह आंध्र प्रदेशातही एनडीएला यश मिळाले आहे. या राज्यात तीन जागांपैकी एनडीएला दोन तर अपक्षाला एक जागा मिळाली आहे. आंध्रात वायएसआर काँग्रेस आणि काँग्रेस हे दोन्ही पक्ष निवडणुकीपासून लांब राहिले.

तेलंगणामध्ये बीआरएसने निवडणूक लढवली आहे. या राज्यात करीमनगर-निझामाबाद-मेडक-अदिलाबाद पदवीधर मतदारसंघातून भाजपचे सी अन्जी रेड्डी आणि शिक्षक मतदारसंघातून भाजपच्या मुल्का कोमैरह यांना मोठा विजय मिळाला. काँग्रेसचा पाठिंबा असलेले पिंगिली श्रीपाल रेड्डी हे वारंगल शिक्षक मतदारसंघातून विजयी झाले.

आंध्र प्रदेशातही एनडीएचा पाठिंबा असलेले दोन उमेदवार विजयी झाले आहेत. तर एका अपक्ष उमेदवाराचा विजय झाला आहे. दोन्ही राज्यांतील विजयानंतर पंतप्रधान मोदींनी एक्सवर पोस्ट करत मतदारांचे आभार मानले आहेत. प्रामुख्याने तेलंगणातील विजय भाजपसाठी महत्वाचा मानला जात आहे. त्यामुळे पंतप्रधानांच्या पोस्टलाही महत्व आले आहे.

पंतप्रधान मोदींनी म्हटले आहे की, एमएलसी निवडणुकीत भाजपला सहकार्य केल्याबद्दल तेलंगणातील नागरिकांचे मी आभार मानतो. तसेच निवडून आलेल्या उमेदवारांनाही शुभेच्छा देतो. लोकांमध्ये समर्पित भावनेतून काम करत असलेल्या पक्षाच्या कार्यकर्त्यांचा मला अभिमान आहे, असे मोदींनी म्हटले आहे.