भाजप-आपमध्ये सापशिडीचा खेळ; केजरीवाल साप अन्...

नवी दिल्ली : निवडणुकीत मतदारांना आकर्षित करण्यासाठी, विरोधकांच्या विरोधात रान उठवण्यासाठी राजकीय नेते कोणत्या क्लुप्त्या लढवतील, हे सांगता येत नाही. दिल्लीमध्ये पुढील वर्षी महापालिकेची निवडणूक होणार आहे. त्यासाठी सत्ताधारी आप व भाजपने कंबर कसली आहे. भाजपने थेट सापशिडीच्या खेळातून आपवर निशाणा साधला आहे. या खेळात मुख्यमंत्री अरविंद केजरीवाल यांच्यासह अन्य काही भाजप नेत्यांना साप बनवण्यात आलं आहे. तर भाजपच्या योजनांना शिडी दाखवण्यात आली आहे.

भाजपचा हा सापशिडीचा खेळ दिल्लीत चर्चेचा मुद्दा बनला आहे. दिल्लीतील झोपडपट्टी भागामध्ये भाजपकडून सापशिडीच्या खेळाचे बोर्डचे वाटप करण्यात आले आहे. झुग्गी सन्मान यात्रेअंतर्गत या भागातील मुलांना या खेळाचे वितरण केले आहे. या बोर्डवर दाखविण्यात आलेल्या सापांना केजरीवाल यांच्यासह उपमुख्यमंत्री मनीष सिसोदिया, राघव चढ्ढा व आतिशी सिंग यांचे चेहरे लावण्यात आले आहेत.

तसेच बोर्डवरील बॉक्समध्ये डीटीसी घोटाळा, शिक्षण घोटाळा, रेशन घोटाळा, दिल्ली जल मंडळ घोटाळा आदींचा उल्लेख करण्यात आला आहे. तसेच भाजप सरकारच्या काही योजनांचा उल्लेखही यावर करण्यात आला आहे. त्यामध्ये जनधन योजना, मुद्रा लोन योजना, स्वच्छ भारत, बेटी बचाओ-बेटी पढाओ आदी योजनांचा समावेश आहे.

याविषयी बोलताना भाजपचे प्रदेशाध्यक्ष आदेश गुप्ता म्हणाले, केजरीवाल यांनी झोपडपट्टीवासियांसाठी विविध योजनांचे आश्वासन दिले होते. पण त्याची पुर्तता झालेली नाही. या खेळामध्ये आम आदमी पक्षाच्या नेत्यांना साप दाखवण्यात आले आहे. तसेच त्यांच्यावर अनेक घोटाळ्यांचे आरोप लावण्यात आले आहेत. केजरीवाल सरकारने दिल्लीच्या जनतेची फसवणूक केली आहे. त्यामुळे त्यांना साप म्हणून दाखवण्यात काहीच आक्षेपार्ह नाही, असं गुप्ता यांनी सांगितलं.

महापालिका निवडणुकीच्या तयारीविषयी बोलताना गुप्ता म्हणाले, महापालिका निवडणुकीसाठी भाजपने सापशिडीचा खेळ सुरू करून तयारीची सुरूवात केली आहे. पण सत्य हे आहे की, हा खेळ आता फक्त लोकांच्या हातात आहे. दिल्लीत पुढील वर्षी महापालिकेच निवडणूक होणार आहे.