UP Accident: भाजप नेत्याच्या नवीन कारला महामार्गावर भीषण आग; दोघांनी उडी मारून वाचवले प्राण! कार जळून खाक

BJP Leader Car Fire: महामार्गावरून धावणाऱ्या नवीन स्कॉर्पिओ कारला अचानक आग लागल्याने एकच खळबळ उडाली. आगीची तीव्रता इतकी होती की, काही क्षणांतच संपूर्ण कार आगीच्या भक्ष्यस्थानी पडली. मात्र, गाडीतील दोघांनी प्रसंगावधान राखत वेळीच बाहेर उडी मारल्याने मोठा अनर्थ टळला. या घटनेत दोघेही सुखरूप बचावले असून कार मात्र पूर्णपणे जळून खाक झाली आहे. उत्तर प्रदेशातील बिजनौर जिल्ह्यातील नूरपूर परिसरात ही घटना घडली.

मेरठ-पौडी महामार्गावरील देवल गावाजवळ ही घटना घडली. भाजपचे माजी आमदार लोकेन्द्र सिंह चौहान यांच्या कुटुंबीयांच्या नवीन स्कॉर्पिओ कारला प्रवासादरम्यान अचानक आग लागली. कारमधून सुरुवातीला धूर बाहेर पडू लागल्याने गाडीतील प्रवाशांना धोका जाणवला. परिस्थितीचे गांभीर्य ओळखून त्यांनी क्षणाचाही विलंब न करता कारमधून बाहेर उडी घेतली. त्यामुळे त्यांचे प्राण वाचले.

कारमध्ये कोण होते?

मिळालेल्या माहितीनुसार, ही स्कॉर्पिओ कार भाजपचे माजी आमदार लोकेन्द्र सिंह चौहान यांचे मोठे बंधू चंद्रप्रकाश सिंह यांच्या मालकीची होती. घटनेच्या वेळी चंद्रप्रकाश सिंह यांच्या पत्नी पल्लवी सिंह आणि चालक कुबेर सिंह हे दोघे कारमधून प्रवास करत होते. मेरठ-पौडी महामार्गावरून जात असताना देवल गावाजवळ अचानक वाहनातून धूर निघू लागला. काही वेळातच धुराचे रूपांतर आगीत झाले.

काही क्षणांत संपूर्ण कार आगीच्या विळख्यात

कारला आग लागल्याचे लक्षात येताच पल्लवी सिंह आणि चालक कुबेर सिंह यांनी तातडीने बाहेर पडण्याचा निर्णय घेतला. दोघांनीही गाडीतून उडी मारल्याने सुदैवाने त्यांना कोणतीही दुखापत झाली नाही. मात्र, कारपासून दूर जाण्यापूर्वीच आगीने रौद्र रूप धारण केले. काही क्षणांत संपूर्ण स्कॉर्पिओ आगीच्या विळख्यात सापडली. पाहता पाहता नवीन कार जळून खाक झाली.

महामार्गावर काही काळ गोंधळाचे वातावरण

धावत्या कारला अचानक आग लागल्याची घटना पाहून महामार्गावरून जाणाऱ्या वाहनचालकांमध्ये घबराट पसरली. आगीच्या घटनेमुळे परिसरात काही काळ गोंधळाचे वातावरण निर्माण झाले. या दुर्घटनेत कोणतीही जीवितहानी झाली नसली, तरी नवीन वाहन जळून नष्ट झाल्याने मोठे आर्थिक नुकसान झाले आहे.

धावत्या वाहनाला अचानक आग लागण्याच्या या घटनेमुळे वाहनांच्या सुरक्षिततेचा प्रश्न पुन्हा ऐरणीवर आला आहे. प्रवासादरम्यान वाहनातून धूर येणे, जळल्याचा वास येणे किंवा इंजिनमध्ये असामान्य बदल जाणवणे अशा बाबींकडे दुर्लक्ष करू नये. अशा वेळी वाहन सुरक्षित ठिकाणी थांबवून तातडीने बाहेर पडणे आवश्यक आहे. बिजनौरमधील या घटनेत दोघांनी वेळीच घेतलेल्या निर्णयामुळे मोठी दुर्घटना टळली.