Congress Politics : काँग्रेसमध्ये बंडाचा झेंडा, मुख्यमंत्रि‍पदापासून डावलेला नेता राजीनामा देण्याच्या तयारीत!

Congress News : केरळममध्ये मुख्यमंत्रिपदाची संधी नाकारल्यामुळे नाराज झालेले माजी प्रदेशाध्यक्ष रमेश चेन्निथला यांनी संयुक्त लोकशाही आघाडीच्या (यूडीएफ) बैठकीला अनुपस्थित राहून निषेध नोंदविला.

चेन्निथला यांनी राहुल गांधी यांच्याकडे नाराजी व्यक्त करत आमदारकीचा राजीनामा देण्याची तयारी दर्शवली आहे. काँग्रेसचे राष्ट्रीय अध्यक्ष मल्लिकार्जुन खर्गे त्यांची मनधरणी करीत आहेत. रविवारी (ता. १७) यावर अंतिम निर्णय होण्याची शक्यता आहे.

अखिल भारतीय काँग्रेस समितीच्या सरचिटणीस दीपादास मुन्शी व अन्य वरिष्ठ नेते चेन्निथला यांची समजूत काढण्याचा प्रयत्न करत असून, त्यांना मंत्रिमंडळात सहभागी होण्याचे आवाहन केले आहे. गुरुवायूर मंदिरात दर्शन घेऊन परतल्यानंतर सतीशन यांनी चेन्निथला यांची भेट घेऊन त्यांचे आशीर्वाद घेतले. यावेळी चेन्निथला यांनी नव्या मुख्यमंत्र्यांना पाठिंबा दर्शविला.

व्ही. डी. सतीशन सरकारचा शपथविधी सोमवारी (ता.१८) पार पडणार आहे. मंत्रिमंडळातील २० सदस्यांच्या खातेवाटपाबाबत उद्या (ता.१६) ‘यूडीएफ’च्या नेत्यांची पुन्हा बैठक होणार आहे. काँग्रेसमध्ये सतीशन व चेन्न्निथला गटांमधील अंतर्गत संघर्ष तीव्र झाला असला तरी मुस्लिम लीग, केरळ काँग्रेस व ‘आरएसपी’ या घटक पक्षांनी सतीशन यांना समर्थन दिले आहे.

सतीशन-विजयन भेट

केरळचे नियोजित मुख्यमंत्री व्ही. डी. सतीशन यांनी मावळते मुख्यमंत्री पिनराई विजयन यांची त्यांच्या निवासस्थानी आज भेट घेतली. अखिल भारतीय काँग्रेस समितीने मुख्यमंत्री म्हणून सतीशन यांच्या नावाची घोषणा केल्यानंतर त्यांनी ज्येष्ठ नेत्यांच्या भेटीगाठी घेण्यास सुरुवात केली आहे. सतीशन हे गुरुवारी दुपारी विजयन यांच्या निवासस्थानी पोहोचले. दोन्ही नेत्यांमध्ये विविध विषयांवर चर्चा झाली. विजयन यांनी सतीशन यांना घरात नेले.

विजयन यांचे कौतुक

चहापानावेळी दोन्ही नेत्यांमध्ये आरोग्य आणि आहाराबाबत अनौपचारिक गप्पा झाल्या. सतीशन यांनी विजयन यांच्या शिस्तबद्ध जीवनशैलीचे कौतुक केले. विधानसभा निवडणुकीत डावी लोकशाही आघाडीच्‍या (एलडीएफ) चा पराभव झाल्यानंतर विजयन यांनी शासकीय निवासस्थान सोडले आहे. सध्या ते बेकरी जंक्शन येथे एका घरात भाडेतत्वावर राहत आहेत.