Congress Politics : काँग्रेसचा मुख्यमंत्री राजीनामा देण्याच्या तयारीत! राहुल गांधींनी बैठक घेतली अन्...

Congress News : काँग्रेसमध्ये मोठ्या घडामोडी घडत असून कर्नाटकचे मुख्यमंत्री सिद्धरामय्या दोन दिवसात राजीनामा देणार आहेत. शुक्रवारी ते राजीनामा देतील, असे खात्रीलायक सुत्रांनी सांगितल्याचे वृत्त मराठी वृत्तपत्राने प्रसिद्ध केले आहे.

कर्नाटकमध्ये काँग्रेसचे सरकार आल्यानंतर सिद्धरामय्या आणि डी के शिवकुमार यांच्यात अडीच अडीच वर्षांचे मुख्यमंत्रिपद देण्याचे ठरले होते. मात्र, अडीच वर्षानंतर देखील सिद्धरामय्या हे मुख्यमंत्रि‍पदी कायम राहावे म्हणून त्यांच्या समर्थकांकडून प्रयत्न केले जात आहेत.

77 वर्षीय सिद्धरामय्या यांनी मुख्यमंत्रिपद सोडावे, यासाठी काँग्रेसमधून त्यांच्यावर दबाव आहे. ठरलेल्या फाॅर्मुल्यानुसार उपमुख्यमंत्री डी के शिवकुमार हे पुढील मुख्यमंत्री होणार आहेत. याबाबत काँग्रेसकडून अधिकृत माहिती देण्यात आली नाही. मात्र, शिवकुमार हे पुढील मुख्यमंत्री असतील हे निश्चित झाले आहे.

मंगळवारी दिल्लीत वेगवान घडामोडी घडल्या. राहुल गांधी यांच्या उपस्थितीमध्ये बैठक झाली. या बैठकीला सिद्धरामय्या, डी के शिवकुमार यांच्यासह काँग्रेस अध्यक्ष मल्लिकार्जून खर्गे, के सी वेणूगोपाल उपस्थित होते. ही बैठक राज्यसभा आणि विधान परिषदेचे उमेदवार ठरवण्यासाठी झाल्याचे सांगितले जात आहे. मात्र या बैठकीत नेतृत्वबदला बाबत चर्चा झाल्याची माहिती आहे. दरम्यान, सिद्धरामय्या यांनी नेतृत्वबदल ही केवळ अफवा असल्याचे सांगितले आहे.

सिद्धरमय्या राज्यसभेवर जाणार?

मिळालेल्या माहितीनुसार सिद्धरामय्या यांना राज्यसभेवर जाण्याची ऑफर देण्यात आली आहे. दिल्लीत संघटनेमध्ये त्यांच्यावर महत्त्वाची जबाबदारी देण्यात येणार आहेत. सिद्धरामय्या यांच्या समर्थकांकडून मात्र विधानसभेची मुदत संपेपर्यंत त्यांनी मुख्यमंत्रि‍पदी कायम राहिले पाहिजे, अशी मागणी केली आहे. त्यामुळे पेच आणखी वाढल्याची माहिती आहे.