Rekha Gupta Clarification : दिल्लीच्या मुख्यमंत्री कार्यालयातून 'ते' फोटो हटवल्याबाबत खुद्द मुख्यमंत्री रेखा गुप्ता यांनीच दिले स्पष्टीकरण, म्हणाल्या...

Delhi CM Office Ambedkar and Bhagat Singh Photo Controversy : दिल्लीच्या नवीन मुख्यमंत्री रेखा गुप्ता यांनी कार्यभार स्वीकारताच त्यांच्या कार्यालयात झालेला एक बदल चर्चेचा विषय ठरला आहे. मुख्यमंत्री रेखा गुप्ता यांच्या कक्षातील भिंतीवरील डॉ. बाबासाहेब आंबेडकर आणि भगतसिंह यांचे फोटो हटवले गेले. ही बाब समोर आल्यानंतर राजकीय वर्तुळात उलटसुलट चर्चा सुरू झाल्या. अखेर यावर आता खुद्द मुख्यमंत्री रेखा गुप्ता यांनीच स्पष्टीकरण दिलं आहे.

याबाबत विचारण्यात आलेल्या प्रश्नाला उत्तर देताना मुख्यमंत्री रेखा गुप्ता(Rekha Gupta) यांनी सांगितले की, इथे सरकारचे प्रमुख, देशाचे राष्ट्रपती आणि राष्ट्रपती महात्मा गांधी यांचा फोटो लागला नाही पाहीजे का? तसेच त्यांनी पुढे म्हटले की, शहीद भगतसिंह आणि डॉ. बाबासाहेब आंबेडकर हे आपल्या देशाचे प्रणेते आहेत, ते पूजनीय, आदरणीय आणि मार्गदर्शक आहेत.

या बदलावरून विरोधकांनी भाजपवर(BJP) टीका सुरू केली आहे. आम आदमी पार्टी आणि काँग्रेसने याला डॉ. बाबासाहेब आंबेडकर आणि भगतसिंह यांचा अपमान म्हटले आहे आणि आरोप केला आहे की, भाजप सरकार इतिहास बदलण्याचा प्रयत्न करत आहे.

व्हायरल फोटोत दिसत आहे की, आता मुख्यमंत्री कार्यालयात राष्ट्रपती द्रौपदी मुर्मू, महात्मा गांधी आणि पंतप्रधान मोदी(PM Modi) यांचे फोटो लागले आहेत. तर आधीच्या फोटोत डॉ. बाबासाहेब आंबेडकर आणि भगतसिंह यांचे फोटो दिसून येत आहेत.

या मुद्य्यावर सोशल मीडियावर संमिश्र प्रतिक्रिया येत आहेत. काही लोक यास एक सामान्य बदल मानत आहेत, तर काहीजण इतिहासाशी छेडछाड म्हणत आहेत.यावर मुख्यमंत्री रेखा गुप्ता यांनी स्पष्टीकरण दिले आहे, परंतु हा वाद थांबताना दिसत नाही. आता हे पाहणे औत्सुक्याचे ठरणार आहे की आगामी काळात सरकार याबाबत काय पावलं उचलते आणि विरोधक हा राजकीय मुद्दा बनवतात की नाही.

(Edited by - Mayur Ratnaparkhe)