EC to Rahul Gandhi : 'पनौती' टीकेवरून निवडणूक आयोगाची राहुल गांधींना नोटीस, उत्तर देण्यासाठी शनिवारपर्यंत मुदत

Rajasthan Election 2023 : काँग्रेस नेते राहुल गांधी पुन्हा एकदा अडचणीत आले आहेत. राजस्थानमध्ये निवडणूक प्रचारादरम्यान पंतप्रधान मोदींना 'पनौती' म्हणत त्यांनी टीका केली होती. भाजपने यावर आक्षेप घेत राहुल गांधींविरोधात निवडणूक आयोगात टीका केली होती. भाजपच्या तक्रारीची दखल घेत निवडणूक आयोगाने राहुल गांधी यांना नोटीस बजावली आहे. या नोटीसला उत्तर देण्यासाठी निवडणूक आयोगाने राहुल गांधी यांना शनिवारपर्यंत मुदत दिली आहे.

विश्वचषकाच्या अंतिम सामन्यात भारताचा पराभव झाल्यावरून राहुल गांधी यांनी पंतप्रधान मोदींवर हल्लाबोल करत 'पनौती', 'पाकीटमार' आणि कर्जमाफी संबंधी टीका केली होती. भाजपने बुधवारी निवडणूक आयोगात राहुल गांधी यांच्यासह काँग्रेस अध्यक्ष मल्लिकार्जुन खर्गेंविरोधात तक्रार दाखल केली होती. या तक्रारीत राहुल गांधी आणि खर्गेंवर कारवाई करण्याची मागणी भाजपने केली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

भाजपने काय म्हटले तक्रारीत?

राहुल गांधी आणि मल्लिकार्जुन खर्गेंवर कारवाई व्हायला हवी. कारण अशा वक्तव्यांमुळे निवडणुकीचे ( Rajasthan Election ) वातावरण बिघडू शकते. तसेच प्रतिष्ठीत व्यक्तींना बदनाम करण्यासाठी अपशब्द, आक्षेपार्ह भाषेचा वापर आणि खोट्या बातम्या रोखणं अवघड होईल, असे भाजपने म्हटले होते. यासोबत राहुल गांधी यांनी माफी मागावी, अशी मागणीही भाजपने केली आहे.

इंदिरा गांधीवरूनही भाजपने साधला निशाणा

दिवंगत पंतप्रधान इंदिरा गांधी आणि गृहमंत्री बुटा सिंग हे राजधानी दिल्लीत १९८२ मध्ये एशियाड हॉकी फायनल बघण्याासाठी गेले होते. त्यावेळी पाकिस्तानने भारताचा ७-१ असा पराभव केला होता. भारताचा सामन्यात पराभव होत असल्याचे पाहून त्यावेळी इंदिरा गांधी या सामना मध्येच सोडून निघून गेल्या होत्या. हा भारतीय संघाचा अपमान होता. आणि इंदिरा गांधींच्या वर्तनाने भारतीय संघाचे मनोधैर्य खचले होते, असे म्हणत भाजप राहुल गांधींच्या टीकेला प्रत्युत्तर दिले.

Edited by Sachin Fulpagare