Milkipur Election : भाजपची चूक, मिल्कीपूरमध्ये पोटनिवडणूक घेण्याचे आयोगाने टाळले; देशातील एकमेव मतदारसंघ आमदाराविना?

Uttar Pradesh Politics : केंद्रीय निवडणूक आयोगाने मंगळवारी महाराष्ट्र आणि झारखंडच्या विधानसभा निवडणुकांचे वेळापत्रक जाहीर केले. त्यासोबत देशभरातील तब्बल 48 विधानसभा आणि दोन लोकसभा मतदारसंघांच्या पोटनिवडणुकांचीही घोषणा केली. मात्र, देशातील एकमेव विधानसभा मतदारसंघाची पोटनिवडणूक घेण्याचे आयोगाने टाळले आहे.

अयोध्या जिल्ह्यातील मिल्कीपूर मतदारसंघाची पोटनिवडणूक जाहीर होणेही अपेक्षित होते. त्यासाठी सर्वच पक्षांनी जोरदार तयारीही केली होती. पण आयोगाकडून या मतदारसंघाचा समावेश केला नाही. त्यामुळे सध्यातरी या मतदारसंघात पोटनिवडणूक होणार नसल्याने 23 नोव्हेंबरनंतर मिल्कीपूर हा आमदार नसलेला एकमेव मतदारसंघ ठरू शकतो.

आयोगाने केला खुलासा

मिल्कीपूर विधानसभा मतदारसंघात पोटनिवडणूक घेण्यामागचे कारण आयोगाने सांगितले आहे. समाजवादी पक्षाचे खासदार अवदेश प्रसाद हे या मतदारसंघाचे प्रतिनिधित्व करत होते. त्यांनी लोकसभा निवडणुकीआधी आमदारकीचा राजीनामा दिल्याने या मतदारसंघात पोटनिवडणूक होणे अपेक्षित होते. मात्र, 2022 मध्ये भाजपचे उमेदवार गोरखनाथ बाबा यांनी अवधेश प्रसाद यांच्याविरोधात एक याचिका दाखल केली होती. या याचिकेवरील सुनावणी प्रलंबित असल्याचे कारण देत आयोगाने पोटनिवडणूक घेण्याचे टाळले.

लोकसभा निवडणुकीत अवधेश प्रसाद विजयी झाल्यानंतरही गोखनाथ बाबा यांनी याचिका मागे घेतली नाही. त्यामुळे याबाबतचा अहवाल निवडणूक अधिकारी आणि राज्य निवडणूक आयोगाकडून केंद्रीय आयोगाकडे गेला. त्याआधारे आयोगाने हा निर्णय घेतल्याचे सांगितले जात आहे.

भाजपने जाणीवपूर्वक टाळले

अयोध्येचा समावेश असलेल्या फैजाबाद लोकसभा मतदारसंघात भाजपच्या उमेदवाराचा अवधेश प्रसाद यांनी पराभव केला आहे. याच अयोध्येमध्ये मिल्कीपूर मतदारसंघही आहे. त्यामुळेच भाजपने जाणीवपूर्वक पोटनिवडणूक घेण्याचे टाळल्याचा आरोप समाजवादी पक्षाने केला आहे.

याचिका मागे घेणार

दरम्यान, पोटनिवडणूक जाहीर न झाल्याने गोरखनाथ बाबा यांनी एक-दोन दिवसांत याचिका मागे घेणार असल्याचे स्पष्ट केले आहे. याचिका मागे घेतल्यानंतर याबाबत निवडणूक आयोगालाही कळवले जाईल, असे त्यांच्या वकिलांकडून सांगण्यात आले. मात्र, त्यानंतरही आयोगाकडून निवडणूक जाहीर केली जाणार का, याबाबत उत्सुकता वाढली आहे.