सिध्दूंची बहीण पत्रकार परिषदेत रडली अन् पत्नी म्हणाली, मी तिला ओळखतच नाही!

अमृतसर : काँग्रेसचे प्रदेशाध्यक्ष नवज्योतसिंग सिध्दू (Navjot Singh Sidhu) यांच्या बहिणीवर त्यांच्यावर अनेक गंभीर आरोप केले आहेत. या कौटूंबिक वादाविषयी सांगताना पत्रकार परिषदेतच त्यांना रडू कोसळलं. घरी जाऊनही त्यांनी घरात घेतले नाही, ते निर्दयी आहेत, असा आरोप त्यांनी केला. यावर अद्यापपर्यंत सिध्दूंची प्रतिक्रिया आली नसली तरी त्यांच्या पत्नी धावून आल्या आहेत.

पंजाब विधानसभा निवडणुकीची (Punjab Election 2022) रणधुमाळी सुरू असतानाच सिध्दू कौटूंबिक वादात अडकले आहेत. सिध्दू यांची बहीण सुमन तूर (Suman Toor) या अमेरिकेत राहतात. काही दिवसांपूर्वीच त्या चंडीगडमध्ये आल्या आहेत. त्यांनी चंडीगडमध्ये शुक्रवारी पत्रकार परिषद घेत सिध्दूंवर अनेक आरोप केले. या आरोपांना उत्तर देताना सिध्दू यांच्या पत्नी व काँग्रेसच्या नेत्या नवजोत कौर सिध्दू (Navjot Kaur Sidhu) यांनी थेट आपण संबंधित महिलेला ओळख नाही, अशी प्रतिक्रिया दिली.

नवजोत कौर म्हणाल्या, मी त्या महिलेला ओळखत नाही. सिध्दू यांच्या वडिलांना पहिल्या पत्नीपासून दोन मुली आहेत. त्यांच्याविषयी मला माहित नाही, असं नवजोत कौर यांनी म्हटलं आहे. त्यामुळे सिध्दू यांच्या कुटुंबातील वाद आणखी वाढण्याची शक्यता आहे. दरम्यान, तूर यांनी पत्रकार परिषदेत सांगितले की, सिद्धू यांनी वडील भगवंत सिध्दू यांच्या मृत्यूनंतर आई निर्मल आणि मोठ्या बहिणीला घरातून बाहेर काढले. त्यानंतर रेल्वे स्थानकात एका बेवारस प्रमाणे आईचा मृत्यू झाला. आईने आपली ओळख लपवली होती. सिद्धू यांनी हे सगळं संपत्तीसाठी केल्याचा आरोप तूर यांनी केला आहे. पत्रकार परिषदेत तूर यांना रडू कोसळलं. (Navjot Singh Sidhu News)

मी 1990 मध्ये अमेरिकेत (America) गेले. पण सिध्दूंनी आईचे खूप हाल केले. मी अनेकदा सिध्दूंशी बोलण्याचा प्रयत्न केला. पण मला घरात घुसू दिले नाही. त्यांच्या अमृतसर येथील घरी 20 जानेवारी रोजी गेले होते. पण गेट उघडण्यात आलं नाही. सिध्दू यांनी मल व्हॉट्सअॅपवरही ब्लॉक केलं आहे. सिद्धू हे आपल्या आई-वडिलांविषयी खोटं बोलत आहेत. त्याबाबतची कागदपत्रेही आपल्याकडे असल्याचा दावा तूर यांनी केला आहे.

सिध्दू यांनी म्हटलं होतं की, आईवडील मी दोन वर्षांचा असताना वेगळे झाले होते. पण हे खोटं आहे, असे सांगत तूर यांनी कुटुंबाचा फोटो दाखवला. दरम्यान, याबाबत सिध्दू यांच्याकडून अद्याप कोणतीही प्रतिक्रिया आलेली नाही. सिध्दू यांच्यावर करण्यात आलेल्या या आरोपांमुळे आता पंजाबमधील राजकारण ढवळून निघणार आहे.

पंजाबमध्ये सिध्दू व मुख्यमंत्री चरणजित सिंग चन्नी यांच्या नेतृत्वाखाली काँग्रेस निवडणुकीला सामोरे जात आहे. सिध्दू यांच्यावर माजी मुख्यमंत्री अमरिंदरसिंग यांनीही गंभीर आरोप केले आहेत. आता सिध्दू यांच्या बहिणीनेही कौटुंबिक वाद जगासमोर आणत त्यांच्या अडचणी वाढवल्या आहेत.