Plane crash News : मोठी बातमी : आणखी एका चार्टर्ड विमानाचा अपघात, 7 जण करत होते प्रवास; 26 दिवसांत दुसऱ्या घटनेने खळबळ

Air ambulance tragedy : दिवंगत उपमुख्यमंत्री अजित पवार यांच्या विमान अपघातातील निधनानंतर संपूर्ण देशाला हादरा बसला होता. या चार्टर्ड विमानाच्या अपघातानंतर अनेक शंका उपस्थित केल्या जात आहेत. केंद्रीय यंत्रणांकडून अपघाताची सखोल चौकशी सुरू असतानाच आणखी एका चार्टर्ड विमानाच्या अपघाताने खळबळ उडाली आहे. सोमवारी रात्री झालेल्या या अपघातात विमानातील सातपैकी एकाचा मृत्यू झाल्याचे वृत्त आहे.

झारखंडमधील रांची विमानतळावरून या विमानाने उड्डाण केल्यानंतर काही वेळात ते रडारवरून गायब झाले. त्यानंतर छतरा जिल्ह्यातील करमाटांड गावाजवळ दाट जंगलात हे विमान कोसळल्याचे सांगितले जात आहे. या विमानाचा वापर एअर एम्ब्युलन्स म्हणून केला जात होता. रांचीहून एका रुग्णाला घेऊन हे विमान दिल्लीकडे निघाले होते. अपघातामध्ये याच रुग्णाचा मृत्यू झाल्याचे समजते.

विमानातील ४१ वर्षीय रुग्णाचे नाव संजय कुमार असल्याचे सांगितले जात आहे. एका आगीच्या घटनेमध्ये ते भाजले होते. त्यांना पुढील उपचारासाठी दिल्लीला नेले जात होते. विमानातील सात जणांमध्ये रुग्णासह एक डॉक्टर, एक कर्मचारी, दोन रुग्णाचे नातेवाई, एक मुख्य पायलट आणि एका को पायलटचा समावे आहे.

अपघाताबाबत डीजीसीएने दिलेल्या अधिकृत माहितीनुसार, रेडबर्ड एअरवेज प्रायव्हेट लिमिटेड या कंपनीचे बीचक्राफ्ट सी ९० या विमानाने रांचीहून दिल्लीसाठी उड्डाण केले होते. झारखंडमधील छतरा जिल्ह्यातील कसारिया परिसरात दुर्घटनाग्रस्त झाले आहे. विमानामध्ये दोन पायलटसह एकूण सात जण होते.

विमानाने भारतीय प्रमाणवेळेनुसार, सायंकाळी ७ वाजून ११ मिनिटांनी उड्डाण केले होते. कोलकाता एटीसीसोबत त्यांचा संपर्क झाल्यानंतर काही मिनिटांतच म्हणजे ७ वाजून ३४ मिनिटांनी विमानाचा रडारशी संपर्क तुटला. जिल्हा प्रशासनाने बचावकार्य सुरू केले असून एएआयबीची टीम रवाना झाली आहे, अशी माहिती डीजीसीएने दिली आहे.

छतराचे पोलीस अधिक्षक सुमित अग्रवाल यांनी दिलेल्या माहितीनुसार, गावातील लोकांनी अपघाताबाबत माहिती दिली. त्यानंतर पोलिसांची टीम घटनास्थळी तातडीने रवाना झाली. घनदाट जंगलात विमान अपघातग्रस्त झाले आहे. त्यामुळे बचावकार्यात अडथळे येत असल्याचे त्यांनी सांगितले.