India Post : ट्रम्प यांच्या टॅऱिफ बॉम्बनंतर भारताचा मोठा निर्णय! अमेरिकेला जाणारी टपाल सेवा केली स्थगित

India Post : अमेरिकेचे राष्ट्राध्यक्ष डोनाल्ड ट्रम्प यांनी भारतावर तब्बल ५० टक्के टॅरिफ अर्थात आयात शुल्क लावलं. यामुळं भारतावर याचे गंभीर परिणाम होणार आहेत. यापार्श्वभूमीवर भारतानं आता अमेरिकेला जाणारी आपली टपाल सेवाच स्थगित करण्याचा मोठा निर्णय घेतला आहे. २७ ऑगस्टपासून निर्णय लागू होणार आहे.

यासंदर्भात भारताच्या पोस्ट विभागानं एक प्रसिद्धी पत्रक काढलं आहे. यात म्हटलं की, भारतानं अमेरिकेसाठी टपाल सेवा तात्पुरत्या स्वरुपात स्थगित केली आहे. हा निर्णय अमेरिकेनं भारतावर लादलेल्या टॅरिफच्या धर्तीवर घेण्यात आला आहे. या निर्णायाची अंमलबजावणी येत्या २७ ऑगस्टपासून लागू होणार आहे. या निर्णयामुळं ज्या सर्व पोस्ट सेवेच्या ग्राहकांना त्रास होणार आहे, त्यावर बारकाईनं लक्ष ठेवण्यात येणार आहे.

तसंच हा प्रयत्न केला जाईल की टपाल सेवा लवकरात लवकर पूर्वपदावर यावी. ग्राहकांना आवाहन केलं जात आहे की, त्यांनी टपालानं जाणाऱ्या आपल्या वस्तू तसंच पमेंटच्या स्थितीवर लक्ष द्याव. तसंच जर सेवा उपलब्ध झाली नाही तर त्यांना रिफंडही दिला जाईल.