Ajit Pawar : विधानसभेच्या तोंडावर अजितदादांना मोठा धक्का; भाजपने आमदार फोडला...

Ranchi : झारखंडमध्ये विधानसभा निवडणुकीच्या तोंडावर भाजपने अजित पवारांना मोठा धक्का दिला आहे. अजितदादांच्या राष्ट्रवादी काँग्रेसचे झारखंडमधील एकमेव आमदार कमलेश सिंह भाजपमध्ये प्रवेश करणार आहेत. त्यांच्या पक्षप्रवेशाची तारीखही ठरली आहे.

राष्ट्रवादी काँग्रेसचे स्थापना झाल्यापासून कमलेश सिंह पक्षात आहेत. सध्या ते झारखंड राष्ट्रवादीचे प्रदेशाध्यक्ष आहेत. त्यामुळे अजित पवारांसाठी हा मोठा धक्का मानला जात आहे. आमदार सिंह आणि त्यांचे पुत्र सूर्य सिंह हे काही पदाधिकाऱ्यांसह 3 ऑक्टोबर रोजी भाजपमध्ये प्रवेश करणार असल्याचे समजते.

कमलेश सिंह हे 1999 मध्ये तारिक अन्वर आणि इतर नेत्यांसोबत काँग्रेसमधून शरद पवारांसोबत बाहेर पडले होते. राष्ट्रवादीच्या संस्थापक सदस्यांपैकी ते एक मानले जातात. त्यांनी 2005 मध्ये राष्ट्रवादीच्या तिकीटावर विधानसभेची निवडणूक जिंकली होती. त्यानंतर 2009 पर्यंत ते कॅबिनेट मंत्रीही राहिले. पण 2009 आणि 2014 च्या निवडणुकीत त्यांचा पराभव झाला. 2019 मध्ये पुन्हा ते विजयी झाले.

राष्ट्रवादी काँग्रेसमध्ये फुट पडल्यानंतर कमलेश सिंह यांनी अजित पवारांसोबत जाणे पसंत केले. अजित पवार एनडीएमध्ये गेले आणि तेव्हापासून त्यांची भाजपशी जवळीक वाढत गेल्याचे मानले जाते. आता त्यांनी भाजपच्या तिकीटावर निवडणूक लढण्याचा निर्णय घेतला आहे.

राष्ट्रवादी एनडीएतही नाही

झारखंडमध्ये भाजपने राष्ट्रवादी काँग्रेसला एनडीएतून बाहेर ठेवले आहे. एनडीएमध्ये नितीश कुमारांचा जेडीयू आणि आजसू या दोन पक्षांना घेण्यात आले आहे. या पक्षांसोबतच्या जागावाटपाचा फॉर्म्यूला जवळपास निश्चित झाला आहे. त्यामुळे अजित पवारांसाठी हा दुसरा धक्का आहे. कमलेश सिंह यांच्यासारख्या बड्या नेत्याने साथ सोडल्याने राष्ट्रवादीला राज्यात नव्या नेतृत्वाचा शोध घ्यावा लागणार आहे. कमलेश सिंह भाजपमध्ये जाताना पक्षातून किती नेते, पदाधिकाऱ्यांना सोबत घेऊन जाणार, याबाबतही उत्सुकता वाढली आहे.