Hemant Soren : हेमंत सोरेन यांनी हुकमी एक्का काढला बाहेर! चंपई सोरेन यांच्या भाजप प्रवेशआधीच मोठी खेळी

Ranchi : झारखंडमध्ये ‘कोल्हान टायगर’ म्हणून ओळख असलेल्या चंपई सोरेन यांनी झारखंड मुक्ती मोर्चाला रामराम ठोकला आहे. ते भाजपमध्ये प्रवेश करणार आहे. मुख्यमंत्री हेमंत सोरेन यांच्यासाठी हा मोठा धक्का मानला जात आहे. पण चंपई सोरेन भाजपमध्ये प्रवेश करण्याआधीच मुख्यमंत्र्यांनी मोठी खेळी खेळली आहे.

दिग्गज आदिवासी नेते आणि माजी मुख्यमंत्री चंपई सोरेन यांच्या भाजप प्रवेशाच्या निर्णयामुळे राज्यात मोठा राजकीय भूकंप झाला आहे. काही दिवसांवर येऊन ठेपलेल्या विधानसभा निवडणुकीआधी जेएमएमवर हे संकट ओढवल्याची चर्चा आहे. प्रामुख्याने कोल्हानसारख्या सर्वात मोठ्या आदिवासी भागात पक्षाला मोठा झटका बसण्याची शक्यता आहे.

हेमंत सोरेन यांनी कोल्हान भागातील राजकीय हानी भरून काढण्यासाठी एक सूचक संदेश दिला आहे. त्यांनी चंपई सोरेन यांना टक्कर देऊ शकेल अशा नेत्याला सोबत घेतले आहे. या भागातील घाटशिला मतदारसंघातील आमदार रामदास सोरेन यांचा मंत्रिमंडळात समावेश करण्यात आला आहे.

रामदास सोरेन यांनी सकाळी कॅबिनेट मंत्रिपदाची शपथ घेतली. त्यांची चंपई सोरेन यांच्याजागी वर्णी लागली आहे. हे दोघेही कोल्हान भागात वर्चस्व असलेले नेते आहेत. तसेच रामदास सोरेन यांना चंपई सोरेन यांचे विश्वासू सहकारीही मानले जाते. त्यामुळे मुख्यमंत्र्यांनी एकाच दगडात दोन पक्षी मारले आहेत.

चंपई सोरेन भाजपमध्ये गेल्याने पक्षातील बंडखोरी टाळण्यासाठी रामदास सोरेन यांन मंत्री केल्याची चर्चा आहे. तसेच कोल्हान भागातील संथाल या आदिवासी समाजाला आकर्षित करण्याचा प्रयत्न केला आहे. कोल्हान भागात पक्षाला मजबूत स्थितीत ठेवण्याचेच त्यांचा उद्देश असल्याचे विश्लेषकांचे म्हणणे आहे. चंपई सोरेनही संथाल समाजातील आहेत.

2020 च्या विधानसभा निवडणुकीत जेएमएमला कोल्हान भागातील 14 पैकी 11 जागांवर विजय मिळला होता. तर दोन जागा आघाडीतील काँग्रेसला मिळाल्या होत्या. त्यामुळे चंपई यांच्या जाण्याने पक्षाला फटका बसल्यास बहुमत मिळवण्यातही अडचण येऊ शकते. तर दुसरीकडे भाजपला त्याचा फायदा मिळू शकतो. त्यामुळे हेमंत सोरेन यांनी रामदास तडस यांच्यासारख्या नेत्याला मंत्रिपद देत भाजपला टक्कर देण्याचा प्रयत्न केला आहे. पक्षाचे संस्थापक शिबू सोरेन यांच्यासोबत पक्ष वाढवण्यात त्यांचा मोठा हातभार आहे.