Karnataka Bypolls : भाजपाला धक्का देत काँग्रेसने बड्या नेत्याला फोडले, कुमारस्वामींच्या मुलाविरोधात तगडा उमेदवार

Karnataka Politics : काँग्रेसने कर्नाटकात भाजपला मोठा धक्का दिला आहे. भाजपचे पाचवेळचे आमदार व माजी मंत्री सी. पी. योगेश्वर यांनी काँग्रेसमध्ये प्रवेश केला असून त्यांना चन्नापटना विधानसभा मतदारसंघाच्या पोटनिवडणुकीत उमेदवारीही देण्यात आली आहे. केंद्रीय मंत्री एच. डी. कुमारस्वामी यांच्या मुलाला ते निवडणुकीत टक्कर देणार आहेत.

चन्नापटना हा कुमारस्वामी यांचा मतदारसंघ आहे. खासदार म्हणून निवड झाल्यानंतर त्यांनी आमदारकीचा राजीनामा दिला होता. त्यामुळे या मतदारसंघात निवडणूक होत आहे. योगेश्वर यांनी मागील निवडणुकीत भाजपच्या तिकीटावर कुमारस्वामी यांयाविरोधात शड्डू ठोकला होता. मात्र, त्यांचा पराभव झाला. त्यानंतर त्यांना विधान परिषेदवर पाठवण्यात आले होते.

योगेश्वर हे चन्नापटना पोटनिवडणुकीसाठी इच्छूक होते. मात्र, भाजपने तिकीट न दिल्याने त्यांनी बुधवारी काँग्रेसमध्ये प्रवेश केला. काँग्रेसने त्यांना उमेदवारी जाहीर केल्यानंतर गुरूवारी मुख्यमंत्री, उपमुख्यमंत्र्यांच्या उपस्थितीत त्यांनी अर्जही दाखल केला आहे. एकीकडे ते अर्ज दाखल करत असतानाच जेडीएसकडून कुमारस्वामी यांचे पुत्र निखील यांना उमेदवारी जाहीर करण्यात आली.

निखील यांच्या उमेदवारीमुळे पुन्हा एकदा कुमारस्वामी आणि योगेश्वर यांच्यामध्ये निवडणूक होणार आहे. योगेश्वर यांनी यापूर्वी पाचवेळा या मतदारसंघातून निवडणूक जिंकली आहे. त्यांनी दोनदा काँग्रेसच्या तिकीटावर निवडणूक लढली होती. तसेच भाजप आणि समाजवादी पक्षासह अपक्ष म्हणूनही त्यांनी निवडणूक जिंकली आहे.

दुसरीकडे निखील यांनी यापूर्वी दोनदा निवडणूक लढली असून दोन्हीवेळा त्यांना पराभवाचा सामना करावा लागला आहे. एकदा विधानसभा तर एका लोकसभेच्या निवडणुकीत त्यांचा पराभव झाला आहे. योगेश्वर यांनी निखील यांच्या आईचाही एकदा पराभव केला आहे. आता निखील तिसऱ्यांदा निवडणूक लढवत आहेत. त्यामुळे ते पराभवाची हॅटट्रिक करणार की पहिला विजय मिळवणार, याबाबत उत्सुकता वाढली आहे.