Siddaramaiah : कर्नाटकचे मुख्यमंत्री सिद्धरामय्यांच्या अडचणी वाढणार, गुन्हा दाखल करण्यास राज्यपालांची परवानगी

Siddaramaiah News :कर्नाटकचे मुख्यमंत्री सिद्धरामय्या यांच्या अडचणी वाढण्याच्या शक्यता आहे. जमीन घोटाळ्यात सिद्धरामय्या यांच्यावर गुन्हा दाखल करण्याची परवानगी कर्नाटकचे राज्यपाल थावरचंद गेहलोत यांनी दिली आहे. सिद्धरामय्या यांच्यावर म्हैसूर अर्बन डेव्हलपमेंट अथॉरिटी (एमयूडीए) जमिनीच्या नुकसानभरपाईसाठी बनावट कागदपत्रे सादर केल्याचा आरोप आहे.

जमीन घोटाळ्यावर नोटीस राज्यपालांनी नोटीस बजावून सिद्धरामय्या 26 जुलैला सात दिवसांत उत्तर मागितले होते. मात्र, कर्नाटक सरकारने राज्यपाल त्यांच्या अधिकाराचा गैरवापर करत आहे. त्यांनी नोटीस मागे घ्यावी म्हणून सल्ला दिला होता.

एमयूडीए घोटाळ्याप्रकरणी मुख्यमंत्री सिद्धरामय्या, पत्नी, मेहुणा आणि काही अधिकाऱ्यांविरोधात तक्रार दाखल करण्यात आली आहे. सिद्धरामय्या यांनी अधिकाऱ्यांच्या संगनमताने बनावट कागदपत्रे फसवणूक करून महागड्या जागा मिळवल्याचा आरोप केला होता.

नेमकं प्रकरण काय?

1992 मध्ये म्हैसूर नागरी विकास प्राधिकरणाने (एमयूडीए) शेतकऱ्यांकडून काही जमीन निवासी क्षेत्रात विकसित करण्यासाठी घेतल्या होत्या. त्या बदल्यात ज्यांची जमीन दिली. त्यांनी विकसित जमिनीतील 50 टक्के जागा किंवा पर्यायी जागा देण्याचा निर्णय घेतला होता. पुढे या जमिनीतील शेतजमीन वेगळी करून शेतकऱ्यांना परत केली. सिद्धरामय्या यांच्या पत्नी पार्वती यांच्या भावाने 2004 मध्ये तीन एकर जमीन खरेदी केली होती.

सिद्धरामय्या यांचे कुटुंब या जमिनीची मालकी घेण्यासाठी गेले असता तेथील ती जमीन आधीच विकसित झाल्याचे आढळून आले. त्यामुळे भरपाई म्हणून सिद्धरामय्या यांची पत्नी पार्वती यांना म्हैसूरच्या एका महागड्या भागात जमीन देण्यात आली . पार्वती यांना दिलेल्या जमिनीची किंमत एमयूडीएने घेतलेल्या जमिनीपेक्षा जास्त असल्याचा आरोप होत आहे. सिद्धरामय्या हे उपमुख्यमंत्री तसेच सरकारमध्ये असताना अधिकाऱ्यांना हाताशी धरून त्यांनी हा घोटाळा केल्याचा आरोप आहे.