Lalu Prasad Yadav : लालू प्रसादांच्या अडचणीत मोठी वाढ! 'लँड फॉर जॉब' प्रकरणात कोर्टाचा दणका; आता थेट...

लालू प्रसाद यादव यांच्या अडचणीत मोठी भर पडली असून ‘लँड फॉर जॉब’ प्रकरणात दिल्लीतील राउज अव्हेन्यू न्यायालयाने मोठा निर्णय दिला आहे. या प्रकरणात राष्ट्रीय जनता दलाचे प्रमुख आणि माजी रेल्वेमंत्री लालू प्रसाद यादव यांच्यासह एकूण 41 आरोपींवर आरोप निश्चित करण्यात आले आहेत. सीबीआयच्या विशेष न्यायालयाने सर्व बाजूंचे युक्तिवाद ऐकून घेतल्यानंतर हा आदेश दिला असून आता या प्रकरणाचा प्रत्यक्ष खटला सुरू होणार आहे.

न्यायालयाच्या या निर्णयामुळे लालू यादव कुटुंबासमोरील कायदेशीर अडचणी वाढल्या आहेत. कोर्टाने स्पष्टपणे म्हटले आहे की या प्रकरणात पुढील सुनावणीसाठी पुरेसा प्राथमिक आधार उपलब्ध आहे. त्यामुळे आता आरोपींविरोधात साक्षीपुरावे सादर केले जातील आणि सविस्तर खटला चालवला जाईल. न्यायालयाने असेही निरीक्षण नोंदवले आहे की लालू यादव यांनी आपल्या पत्नी आणि मुलांच्या नावावर स्थावर मालमत्ता जमा केली आणि इतर आरोपींनी या कथित कटात त्यांना सहकार्य केले.

या प्रकरणात एकूण 103 आरोपींची नावे चार्जशीटमध्ये होती. त्यापैकी 52 जणांना आरोपमुक्त करण्यात आले असून पाच आरोपींचा मृत्यू झाल्यामुळे त्यांच्यावरील कारवाई थांबवण्यात आली आहे. उर्वरित 41 आरोपींवर आता औपचारिकपणे आरोप निश्चित झाले असून पुढील टप्प्यात खटल्याची प्रक्रिया सुरू होणार आहे.

सीबीआयने केलेल्या आरोपांनुसार, लालू यादव रेल्वेमंत्री असताना रेल्वेमध्ये ग्रुप डी पदांवर नोकरी देण्याच्या बदल्यात उमेदवारांकडून जमीन घेतली गेली. ही जमीन थेट लालू यादव यांच्या कुटुंबीयांच्या किंवा त्यांच्या जवळच्या लोकांच्या नावावर नोंदवण्यात आली असल्याचा दावा तपास यंत्रणेने केला आहे. हा प्रकार विशेषतः 2004 ते 2009 या कालावधीत घडल्याचा आरोप आहे, जेव्हा लालू यादव केंद्र सरकारमध्ये रेल्वेमंत्री होते.

या प्रकरणात लालू यादव, त्यांची पत्नी आणि बिहारच्या माजी मुख्यमंत्री राबडी देवी, त्यांची मुलगी मीसा भारती आणि मुलगा तेजस्वी यादव यांच्यासह अनेक नातेवाईक आणि जवळचे सहकारी आरोपी आहेत. मात्र सर्व आरोपींनी हे आरोप फेटाळून लावत हा खटला राजकीय सूडबुद्धीने प्रेरित असल्याचा दावा केला आहे.