Congress News : काँग्रेसकडून तीन राज्यांत भाजपला झटका; आमदार, माजी मंत्र्यांचा पक्षप्रवेश

New Delhi News : लोकसभा निवडणुकीच्या (Lok Sabha Election 2024) तोंडावर काँग्रेसने भाजपला जम्मू-काश्मीर, राजस्थान आणि झारखंडमध्ये तर उत्तर प्रदेशात बहुजन समाज पक्षाला आज धक्का दिला. बसपाचे खासदार दानिश अली यांनी आज काँग्रेसमध्ये प्रवेश केला, तर झारखंडमधील भाजपचे आजी-माजी आमदार, काश्मीरमधील माजी मंत्र्यांनी आज भाजपला सोडचिठ्ठी देत काँग्रेसला साथ दिली. राजस्थानमधील भाजपचे नेतेही काँग्रेसमध्ये प्रवेश करणार आहेत.

काँग्रेससाठी (Congress) आजचा दिवस महत्त्वाचा ठरला. बिहारमध्ये माजी खासदार पप्पू यादव यांनी त्यांचा पक्ष काँग्रेसमध्ये विलीन केला. त्यामुळे या राज्यात काही भागात काँग्रेसची ताकद वाढली आहे, तर झारखंडमध्ये भाजपचे (BJP) आमदार जय प्रकाश पटेल आणि माजी आमदार राज पालीवार यांनी भाजपला राम राम ठोकत काँग्रेसमध्ये प्रवेश केला.

जम्मू काश्मीरमधील भाजपचे नेते व माजी मंत्री लालसिंह चौधरी यांनीही बुधवारी काँग्रेसला साथ दिली. 370 चा नारा देणारे या निवडणुकीत पराभूत होतील, असा दावा चौधरी यांनी काँग्रेसमध्ये दाखल झाल्यानंतर दिला. राजस्थान भाजपचे नेते प्रल्हाद गुंजल यांनीही भाजपला सोडचिठ्ठी देण्याचा निर्णय घेतला आहे. ते माजी मुख्यमंत्री वसुंधरा राजे यांचे समर्थक मानले जातात. त्यांना लोकसभा निवडणुकीत उमेदवारी मिळण्याची शक्यता आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

उत्तर प्रदेशातील नेते खासदार दानिश अली यांनी आजअखेर काँग्रेसमध्ये प्रवेश केला. मागील काही दिवसांपासून ते काँग्रेस नेत्यांच्या संपर्कात होते. संसदेच्या हिवाळी अधिवेशनादरम्यान पक्षविरोधी कारवाई केल्याप्रकरणी बसपाने त्यांना निलंबित केले होते. त्यानंतर त्यांनी काँग्रेसमध्ये प्रवेशाचे सूतोवाच केले होते.

बिहारमध्ये वाढली ताकद

बिहारमध्ये पप्पू यादव यांनी आज काँग्रेसमध्ये प्रवेश केल्याने इंडिया आघाडी मजबूत झाल्याचे मानले जात आहे. यादव यांनी २०१५ मध्ये राजदतून बाहेर पडत नवा पक्ष स्थापन केला होता. ते पाच टर्म खासदार होते. त्यांच्या पत्नी सध्या काँग्रेसच्या राज्यसभेच्या खासदार आहेत. तसेच दोनदा लोकसभा खासदारही होत्या.

R