जेडीयू काँग्रेसमध्ये विलिन करा : नितीश कुमारांना कोणी दिला सल्ला?

पटना : बिहारचे मुख्यमंत्री आणि जनता दलचे प्रमुख नितीश कुमार (Nitish Kumar) यांनी प्रख्यात राजकीय रणनीतीकार प्रशांत किशोर (Prashant Kishor) यांना प्रत्युत्तर देत, जोरदार सुनावले आहे. "किशोरांना आम्ही कधी निमंत्रण दिले नाही, मात्र ते स्वत:च आमच्याकडे आले होते. या लोकांचा कसलाही नेम नसतो, ते आता भाजपवासी झाले आहेत, त्याप्रमाणे त्यांचे काम सुरू आहे, " असे कुमार म्हणाले.

मागच्या काही दिवसांत प्रशांत किशोर यांच्या एका वक्तव्याची चर्चा होत होती. किशोर म्हणाले होते की, "नितीश कुमारांनी आपल्याला घरी बोलावले होते. त्यांच्या जेडूयू पक्षाचं नेतृत्व करण्यास मला सांगितले होते, परंतु या गोष्टीसाठी आपण नकार दर्शवला, असं खळबळजनक दावा किशोरांनी केले होते. आता यावर स्वत: मुख्यमंत्री नितीश कुमारांनी भाष्य केल्याने आता चर्चा होताना दिसून येत आहे.

नितीश कुमार पुढे म्हणाले की, “ज्यावेळी प्रशांत किशोर माझ्यासोबत कार्यरत होते, तेव्हा ते माझ्याच घरी वास्तव्यास होते. अशांबद्दल आता आम्ही काय टिपणी करावी? चार-पाच वर्षांपूर्वी एकदा ते माझ्याकडे आले आणि पक्षाला काँग्रेसमध्ये विलीन करा असे सुचवत होते, आम्ही काय आमचा पक्ष काँग्रेसमध्ये विलीन करायचा का?

प्रशांत किशोर यांची जनसुराज्य पदयात्रा सुरू आहे. बिहारच्या चंपारण जिल्हा येथील भितिहरवा या गावातल्या महात्मा गांधी आश्रमातून पदयात्रेला सुरूवात झाली. भाजपाप्रणित सरकार उलटून बिहारमध्ये महागठबंधन सरकार अस्तित्वात आल्यानंतर प्रशांत किशोरांची सुरू झालेली पदयात्रा चर्चेचा केंद्रबिंदू ठरत आहे. किशोरांनी सांगितले आहे की, त्यांचे पूर्ण संघटन हीएक अशी राजकीय व्यवस्था निर्माण करण्याचा प्रयत्नात आहे, जी एक व्यक्ती, एक कुटुंब किंवा विशिष्ट समूहापुरती मर्यादित नसेल. संपूर्ण आणि सकल समाजासाठी असेल.