Mohan Bhagwat on LGBTQ Community : LGBTQ+ समुदायाबद्दल सरसंघचालक मोहन भागवतांचे मोठे विधान; म्हणाले, "ते सुद्धा समाजाचा..."

Mohan Bhagwat accepts LGBTQ community: राष्ट्रीय स्वयंसेवक संघाचे प्रमुख मोहन भागवत यांनी LGBTQ+ समुदायाबाबत महत्त्वाचे मत व्यक्त करत समाजात प्रत्येक व्यक्तीला समान सन्मान आणि स्थान मिळाले पाहिजे, असे स्पष्ट केले.

हैदराबाद येथे आयोजित कार्यक्रमात बोलताना त्यांनी LGBTQ+ समुदायातील व्यक्तीही समाजाचाच अविभाज्य भाग असल्याचे सांगितले. समाजाने त्यांच्याकडे सहानुभूती, समजूतदारपणा आणि आदराने पाहण्याची गरज आहे.

मोहन भागवत म्हणाले, "ते सुद्धा समाजाचा भाग आहेत. त्यांनाही समाजात सन्मानाने आणि समानतेने स्थान मिळाले पाहिजे." त्यांनी पुढे सांगितले की, काही व्यक्ती जन्मतःच अशा प्रवृत्ती घेऊन जन्माला येतात आणि ती निसर्गाची देण असते. अशा परिस्थितीत संबंधित व्यक्ती किंवा इतर कोणीही त्यामध्ये बदल करू शकत नाही. काही प्रकरणांमध्ये मानसिकता किंवा शारीरिक प्रवृत्तीमुळे नंतर बदल दिसून येऊ शकतात.

ते म्हणाले, "जेव्हा संपूर्ण जगात अशा व्यक्ती आहेत, तेव्हा भारतात त्या कधीच नव्हत्या, असे म्हणणे योग्य नाही. आपल्या समाजातही अशा व्यक्ती पूर्वीपासून आहेत आणि आपल्या परंपरेने त्यांच्या अस्तित्वाला मान्यता दिली आहे."

भागवत यांनी स्पष्ट केले की, काही परिस्थितींमध्ये बदल शक्य असू शकतो, मात्र ज्या ठिकाणी तो शक्य नाही, तेथे त्या व्यक्तींनाही माणूस म्हणून सन्मानाने जगण्याचा पूर्ण अधिकार आहे. समाजाने त्यांना कमी लेखू नये किंवा त्यांच्याशी भेदभाव करू नये. त्यांच्या अस्तित्वाचा स्वीकार करून त्यांना समाजात योग्य स्थान देणे ही सर्वांची जबाबदारी असल्याचे त्यांनी सांगितले.

यावेळी त्यांनी भारतीय परंपरेचाही उल्लेख केला. काही समुदायांचे स्वतःचे देव-देवता, धार्मिक स्थळे आणि महामंडलेश्वर असून ते कुंभ मेळ्यासारख्या धार्मिक सोहळ्यांमध्येही सहभागी होतात, असे त्यांनी सांगितले. आपल्या संस्कृतीने त्यांना समाजापासून वेगळे न करता त्यांच्यासाठी स्थान निर्माण केले असल्याचे त्यांनी अधोरेखित केले.

याशिवाय, नव्या पिढीच्या जडणघडणीबाबतही भागवत यांनी मार्गदर्शन केले. "आपल्याला मुलांमध्ये जे संस्कार आणि गुण पाहायचे आहेत, ते आधी स्वतःच्या आचरणातून दाखवले पाहिजेत," असे ते म्हणाले. पालकांनी मुलांना रागावण्यापेक्षा त्यांच्याशी प्रेमाने संवाद साधावा, त्यांना समजून घ्यावे आणि चांगले संस्कार देण्यासाठी स्वतःच्या वर्तनातून आदर्श निर्माण करावा. समाजात अपेक्षित सकारात्मक बदल घडवून आणण्यासाठी प्रत्येकाने स्वतःपासून सुरुवात करणे आवश्यक असल्याचेही त्यांनी यावेळी स्पष्ट केले.