New Labour Codes : वेतन कपातीची चिंता मिटली? 'न्यू लेबर कोड'नंतर कर्मचाऱ्यांच्या हातात पूर्वीपेक्षा जास्त पगार येणार? सरकारने दिली मोठी माहिती!

वेतन कपातीबाबत मागील काही महिन्यांपासून कर्मचाऱ्यांमध्ये मोठी चर्चा होती. नवीन लेबर कोड लागू झाल्यावर हातात येणारा पगार कमी होणार का, हा सगळ्यांचा मोठा सवाल होता. सोशल मीडियावरही याच गोष्टीची भीती व्यक्त केली जात होती. बेसिक पगार वाढला की PF अधिक कापला जाईल आणि टेक-होम सॅलरी कमी होईल का? अनेकांना वाटत होते की सॅलरी स्ट्रक्चर बदलल्यामुळे हातात येणारी रक्कम पूर्वीपेक्षा कमी होईल.

पण आता श्रम मंत्रालयाने स्पष्ट केलं आहे की कर्मचार्‍यांची टेक-होम सॅलरी कमी होणार नाही. जोपर्यंत PF ची गणना 15000 रुपयांच्या मर्यादेनुसार होत आहे, तोपर्यंत कर्मचार्‍यांच्या हातावर परिणाम होणार नाही. म्हणजेच बेसिक सॅलरी वाढली तरी PF जास्त कापला जाणार नाही.

कर्मचार्‍यांमध्ये गैरसमज का झाला?

नवीन लेबर कोडनुसार, कोणत्याही कर्मचार्‍याच्या पगारातील बेसिक, DA आणि रिटेनिंग अलाऊन्स मिळून किमान 50 टक्के रक्कम असावी. पूर्वी अनेक कंपन्या बेसिक फार कमी ठेवत आणि अलाऊन्स जास्त दाखवत असत, ज्यामुळे PF आणि इतर देणग्या कमी लागत. आता अलाऊन्स 50 टक्क्यांपेक्षा जास्त असल्यास तो भाग परत बेसिकमध्ये जोडावा लागणार. त्यामुळे अनेकांना वाटले की बेसिक वाढला की PF देखील वाढेल आणि टेक-होम सॅलरी कमी होईल.

मंत्रालयाने स्पष्ट माहिती दिली

सरकारने सांगितलं आहे की टेक-होम सॅलरीवर कोणताही नकारात्मक परिणाम होणार नाही, कारण PF ची अनिवार्य गणना अजूनही 15000 रुपयांच्या सीलिंगनुसारच चालू आहे. म्हणजे तुमची बेसिक सॅलरी 20000 असो वा 30000, PF फक्त 15000 वरच मोजला जाईल. यापेक्षा जास्त PF कापायचा असेल तर कर्मचारी व कंपनी दोघांचीही संमती आवश्यक आहे.

नवीन लेबर कोडचा फायदा काय?

हा कोड सॅलरी स्ट्रक्चर अधिक पारदर्शक करतो. बेसिक आणि अलाऊन्स यांच्यातील प्रमाण नीट ठरल्यामुळे PF, पेंशन, ग्रॅच्युटी यांसारख्या सुविधा भविष्यात अधिक चांगल्या प्रकारे मिळतात. पण PF ची 15000 रुपयांची मर्यादा कायम असेपर्यंत कर्मचार्‍यांच्या हातात येणाऱ्या पगारावर कोणताही बदल होत नाही.