Nitish Kumar: नितिश कुमारांनी महिलेच्या चेहऱ्यावरचा हिजाब खेचला! व्हिडिओ व्हायरल, लाजिरवाण्या कृत्याचा होतोय निषेध

Nitish Kumar Hijab Controversy: बिहारचे मुख्यमंत्री नितीश कुमार हे अधुनमधून विचित्र घटनांसाठी चर्चेत येत असतात. पुन्हा एकदा अशाच एका घटनेसाठी ते चर्चेत आले असून त्यांच्या कृत्याचा सर्वत्र निषेध होत आहे. दंगलफेम माजी अभिनेत्री झायरा वसीम हिनं या प्रकारावरुन नितीश कुमार यांनी माफी मागावी अशी मागणी केली आहे. त्याचबरोबर सोशल मीडियातून देखील युजर्स नितीश कुमारांच्या कृत्याचा समाचार घेत आहेत.

नेमकं काय घडलंय?

बिहारमध्ये एका सरकारी कार्यक्रमात मुख्यमंत्री नितीश कुमार यांच्या हस्ते काही प्रमाणपत्रे वाटप करण्यात आली. एका मुस्लिम डॉक्टर महिलेला देखील पुरस्कार मिळाला, हा पुरस्कार स्विकारण्यासाठी ही महिला व्यासपीठावर गेलेली असताना मुख्यमंत्र्यांनी आपल्यानं हातानं तिला हा पुरस्कार दिला. पण त्याचवेळी त्यांनी या महिलेचा हजाब (चेहरा झाकण्यासाठी वापलं जाणार वस्र) जोरात खेचला. यामुळं संबंधित महिलेला अपमानास्पद परिस्थितीला सामोरं जावं लागलं. नितीश कुमारांच्या या कृत्याचा व्हिडिओ सध्या सोशल मीडियामध्ये प्रचंड व्हायरल झाला आहे. या व्हिडिओवरुन सोशल मीडियात सध्या धुमाकूळ सुरु आहे.

विरोधक म्हणतात मुख्यमंत्र्यांची कृती लाजीरवाणी

या प्रकरणामुळं आता नितीश कुमार हे राजकीय टीकेचे धनी देखील झाले आहेत. काँग्रेससह अनेक विरोधीपक्षांनी मुख्यमंत्र्यांच्या या कृतीला लाजीरवाणं म्हटलं आहे. आरजेडीनं प्रश्न उपस्थित केला की, मुख्यमंत्र्यांना आपलं वागणं आणि जबाबदाऱ्यांची जाणीव आहे का? सोशल मीडियावर देखील मोठ्या संख्येनं लोक या महिलेच्या समर्थनार्थ बोलत आहेत. तसंच सत्तेचा हा दुरुपयोग असल्याचंही त्यांनी म्हटलं आहे.

झायरा वसीमची सडकून टीका

हा व्हायरल व्हिडिओ पाहिल्यानंतर माजी अभिनेत्री झायरा वसीम हीनं नाराजी व्यक्त केली आहे. त्यांनी या महिलेचा आत्मसन्मान आणि खासगी मर्यादेचं उल्लंघन केलं आहे. तिनं म्हटलं की, कोणत्याही पदाला किंवा सत्तेला हा अधिकार नाही की त्यांनी कुठल्याही महिलेच्या धार्मिक आणि वैयक्तिक मर्यादेशी खेळावं. एका मुस्लिम महिलेच्या अनुषंगानं हे दृश्य पाहणं माझ्यासाठी अत्यंत दुःखद आहे.