Pahalgam Terrorist Attack : "पोलिसांच्या वेशात आले, धर्म विचारला अन्... धाड, धाड, धाड..."; टार्गेट करून घातल्या गोळ्या

Pahalgam Terrorist Attack : जम्मू-काश्मीरमधील दहशतवादी हल्ल्याने संपूर्ण देश हादरला आहे. पहलगाम खोऱ्यातील एका रिसॉर्टवरती हा हल्ला झाला. यात 28 हून अधिक जणांचा मृत्यू झाला आहे. तर 13 ते 15 जण जखमी असल्याची माहिती आहे. याबाबत जम्मू-काश्मीर सरकार, केंद्र सरकार किंवा सुरक्षा दलांकडून अद्याप कोणतीही अधिकृत माहिती देण्यात आलेली नाही. जखमींवर पहलगाममधील रुग्णालयात उपचार सुरु आहेत.

इतर राज्यांतून आलेल्या पर्यटकांना केले टार्गेत :

प्रत्यक्षदर्शींनी दिलेल्या माहितीनुसार, पहलगापासून सहा किलोमीटर असलेल्या हॉलिडे रिसॉर्डवरती हा हल्ला झाला आहे. हे रिसॉर्ट रस्त्यापासून काहीसे दूर असल्याने सुरक्षा दलाचे जवानही तिथे उपस्थित नव्हते. अचानक पोलिसांच्या वेशात तीन ते पाच जण तिथे आले. त्यांनी लोकांना नाव आणि धर्म विचारायला सुरुवात केली.

काश्मिरी बोलणाऱ्या, मुस्लीम नागरिकांना बाजूला केले आणि निवडून निवडून लोकांना गोळ्या मारल्या. इतर राज्यांतून आलेल्या पर्यटकांवर या दहशतवाद्यांनी अंदाधूंद गोळीबार केला. काहींच्या डोक्यात तर काहींच्या छातीत गोळ्या घातल्या. या हल्ल्यानंतर जवळपास 30 ते 45 मिनिटांनी सुरक्षा दलाचे जवान तिथे पोहोचले आणि मदत सुरु झाली. जखमींना उपचारासाठी रुग्णालयात दाखल करण्यात आले. काश्मीरच्या आरोग्य मंत्र्यांनीही तातडीने रुग्णालयात धाव घेऊन जखमींवरील उपचाराचा आढावा घेतला.

पंतप्रधान मोदींकडून शहांना सूचना :

दरम्यान, या दहशतवादी हल्ल्याची पंतप्रधान मोदींनी गंभीर दखल घेतली असून, सौदी अरेबियाहून गृहमंत्री अमित शाह यांना थेट फोन लावला आणि तातडीने घटनास्थळी रवाना होण्याचे निर्देश दिले. शिवाय, तेथील सद्य परिस्थितीचा आणि सुरक्षा व्यवस्थेचा आढावा घेण्याचेही सांगितले आहे. याचबरोबर अमित शाह यांनीही ताताडीने या हल्ल्याच्या पार्श्वभूमीवर उच्चस्तरीय बैठक बोलावली आहे.