Parliament Security Breach : घुसखोरांनी बुटातून आणले स्मोक कँडल! पीठासीन अध्यक्षांनीच सांगितली आपबीती

Parliament Winter Session 2023 : लोकसभेमध्ये दोन तरुणांनी घुसखोरी केल्यानंतर सुरक्षेचा प्रश्न ऐरणीवर आला आहे. सर्वसामान्य नागरिकांना लोकसभेत जायचे असल्यास मोठ्या सुरक्षा यंत्रणेतून जावे लागते. पण असे असूनही एका तरुणाने बुटातून स्मोक कँडल नेल्याचे आता समोर आले आहे. पीठासीन अध्यक्ष राजेंद्र अग्रवाल यांनीही याला दुजोरा दिला आहे. तसेच सुरक्षा यंत्रणेत काहीतरी चूक झाल्याची कबुलीही त्यांनी दिली.

लोकसभेच्या (Lok Sabha) सभागृहात घुसखोरी झाली त्यावेळी भाजपचे (BJP) खासदार राजेंद्र अग्रवाल हे पीठासीन अध्यक्ष होते. त्यांच्या डाव्या बाजूकडील प्रेक्षागृहातून तरुणांनी उड्या मारल्या. त्यानंतर एकच गदारोळ झाला. याविषयी ‘एएनआय’शी या वृत्तसंस्थेशी बोलताना अग्रवाल यांनी सुरक्षाव्यवस्थेत चूक झाल्याचे अग्रवाल यांनी सांगितले. (Security breach in Lok Sabha)

घटनेविषयी बोलताना अग्रवाल म्हणाले, प्रेक्षागृहातून एक व्यक्त खाली आल्यानंतर आम्हाला वाटले, कुणीतरी खाली पडले. पण जेव्हा दुसराही व्यक्ती खाली येताना दिसला त्यावेळी आम्ही सर्वजण सतर्क झालो.

एका व्यक्तीने आपल्या बुटातून काहीतरी काढले आणि धूर निघाला. याप्रकरणात संबंधितांवर कारवाई केली जाईल. लोकसभा अध्यक्ष आणि सुरक्षेशी संबंधित यंत्रणा याबाबत निर्णय घेतली. ही घटना घडल्यानंतर संरक्षणमंत्री राजनाथ सिंहही लोकसभेत तातडीने आल्याची माहिती अग्रवाल यांनी दिली.

दरम्यान, या घटनेनंतर तासाभरातच पुन्हा लोकसभेचे कामकाज नियमितपणे सुरू झाले आहे. दुपारी दोन वाजण्याच्या सुमारास अध्यक्ष ओम बिर्ला यांनी कामकाजाची सुरूवात केली. यावेळी विरोधी पक्षातील नेत्यांनी सुरक्षेविषयी प्रश्न उपस्थित केले.

त्यानंतर बिर्ला यांनी सर्व सदस्यांना सुरक्षेविषयी आश्वासित करत या प्रकरणाची संपूर्ण चौकशी केली जाईल, असे सांगितले. तसेच घाबरण्याचे काही कारण नसल्याचे त्यांनी सदस्यांना सांगितले.

(Edited By - Rajanand More)